သျှမ်းပြည်နယ်မြောက်ပိုင်း မုံးကိုးဒေသရှိ စစ်ကောင်စီတပ်စခန်း(၃)ခုအား ထပ်မံသိမ်းပိုက်နိုင်ခဲ့ကြောင်း ယနေ့အောက်တိုဘာလ(၃၀)ရက်နေ့တွင် MNDAA မှ ထုတ်ပြန်ကြေညာခဲ့သည်။
စစ်ကောင်စီတပ်စခန်းအပါအဝင် စစ်ကောင်စီ၏ တပ်သား(၃၀)ဦးကျော်ခန့်နှင့် လက်နက်ခဲယမ်းများစွာကိုလည်း စစ်သုံ့ပန်းအဖြစ် ဖမ်းဆီးနိုင်ခဲ့သည်ဟုဆိုသည်။ ဒါ့အပြင် သိန္နီမြို့မရဲစခန်းကိုလည်း သိမ်းပိုက်နိုင်ခဲ့ကြောင်း ဓာတ်ပုံနှင့်တကွ ဖော်ပြလာပါသည်။
ယနေ့ ညနေပိုင်းတွင်လည်း သျှမ်းပြည်နယ်မြောက်ပိုင်း ကျောက်မဲမြို့နယ် ဂုတ်တွင်းတစ်ဝိုက်ကိုလည်း မြောက်ပိုင်းမဟာမိတ်အဖွဲ့မှ ထိန်းချုပ်ထားလျက်ရှိပြီး ပြင်ဦးလွင်-လားရှိုးလမ်းပိုင်းအား ပိတ်ဆို့ထားပြီဖြစ်ကြောင်း သတင်းရရှိသည်။
သျှမ်းပြည်နယ်မြောက်ပိုင်းအပါအဝင် စစ်ကိုင်းတိုင်းဒေသကြီးအထိ မြောက်ပိုင်းမဟာမိတ်၏ ၁၀၂၇ စစ်ဆင်ရေး ကူးစက်ရောက်ရှိသွားပြီဖြစ်ပြီး ထီးချိုင့်မြို့နယ်တွင်လည်း AA အဖွဲ့နှင့်ဒေသခံ ပြည်သူ့ကာကွယ်ရေးတပ်ဖွဲ့များက တိုက်ပွဲဝင်လျက်ရှိကြောင်း ယနေ့နံနက်ပိုင်းတွင် သတင်းထုတ်ပြန်ခဲ့သည်။
