သျှမ်းပြည်နယ်မြောက်ပိုင်း သီပေါ-လားရှိုးလမ်း စဉ့်အင်ယာယီတံတားအား မိုးအဆက်မပြတ်ရွာသွန်းနေသောကြောင့် မြစ်ရေတက်လာပြီး ဖြတ်သန်းခွင့်ပိတ်ထားရကြောင်း သိရသည်။
“ မနေ့ကတည်းက မိုးရွာလို့ တံတားကနေဖြတ်လို့မရတော့ဘဲ ဖောင်နဲ့ဖြတ်နေရတယ်။ ကားတွေကများပြီး မိုးကလည်းရွာတော့ ကားတွေရာနဲ့ချီပိတ်မိနေတယ်။ ဖြတ်သန်းခကတော့ ဖောင်နဲ့ပဲဖြစ်ဖြစ် တံတားနဲ့ပဲဖြစ်ဖြစ် နှစ်သောင်းကျပ်ပေးရတယ်။” ဟု အဆိုပါတံတားအား ဖြတ်သန်းခဲ့သော သီပေါဒေသခံတစ်ဦးကပြောပြသည်။
ယနေ့ ညပိုင်းအထိ မိုးသည်းထန်စွာရွာသွန်းလျက်ရှိသောကြောင့် ခရီးသွားများအနေဖြင့် လမ်းခရီးစုံစမ်းပြီးမှ သွားရန် လိုအပ်သည်။
စဉ့်အင်တံတားသည် မြောက်ပိုင်းမဟာမိတ်အဖွဲ့၏ စစ်ဆင်ရေး (၁၀၂၇) ကာလအတွင်း မိုင်းခွဲဖျက်ဆီးခံထားရခြင်းဖြစ်ကာ ယနေ့အထိပြန်လည်ပြုပြင်နိုင်ခြင်းမရှိသေးပါ။
