မိုးသည်းထန်စွာရွာသွန်းမှုကြောင့် ဒီကနေ့ စက်တင်ဘာလ ၁၉ ရက် နံနက်ပိုင်းက သျှမ်းပြည်တောင်ပိုင်း၊ လွိုင်လင်−မိုင်းပွန် ပြည်ထောင်စုလမ်းမပေါ်ရှိ ခေါင်းနွှဲတောင်မှာ တောင်ကျရေကြောင့် ကားလမ်းမကြီး အောက် မြေကျွံကျပြီး ဂလိုင်ပေါက်ကြီး ဖြစ်ပေါ်နေတယ်လို့ ခရီးသွားပြည်သူတစ်ဦးထံမှ သိရပါတယ်။
အဆိုပါလမ်းပိုင်းအသုံးပြုသူတွေ အန္တရာယ်မဖြစ်စေဖို့ သတိပေးတဲ့အနေနဲ့ ခရီးသွားပြည်သူတစ်ဦးက ကျောက်တုံးများချကာ အမှတ်အသားပြုလုပ်ပေးခဲ့ပြီး သက်ဆိုင်ရာ တာဝန်ရှိသူတွေအနေနဲ့ အမြန်ဆုံး ပြင်ဆင်ပေးဖို့ လိုအပ်တယ်လို့ ဆိုပါတယ်။
“ တောင်စောင်းတွေမှာ လမ်းပခုံး ရေနှုတ်မြောင်းမပါပဲ ဖြစ်သလို ခင်းထားကြတော့ အခုလို မိုးများတဲ့ ချိန်ဆို အပေါ်က တောင်ကျရေအရှိန်နဲ့ဆို လမ်းတွေပျက်စီးနိုင်တယ်၊ အခုလို ဂလိုင်ပေါက်တွေ ဖြစ်သွားတော့ တွဲကားတွေ၊ ကုန်တင်ကားတွေအတွက် အရမ်းအန္တရာယ်များတယ်၊ သက်ဆိုင်ရာ လမ်းဦးစီးနဲ့ တာဝန်ယူတည်ဆောက်တဲ့ ကုမ္ဗဏီတွေ ဒီကိစ္စကို အမြန်ဆုံးဖြေရှင်းပေးသင့်တယ်” လို့ ကားသမားတစ်ဦးက ပြောပါတယ်။
တောင်ကြီး−မိုင်းပွန်−လွိုင်လင် ပြည်ထောင်စုလမ်းပိုင်းဟာ မိုးတွင်းကာလမှာ မကြာခဏ တောင်ပြိုမှု ဖြစ်ပွားတဲ့ လမ်းပိုင်းဖြစ်ပြီး အခုလို လမ်းမကြီးအောက်ပိုင်း ဂလိုင်ပေါက်ကြီး ဖြစ်ပေါ်တဲ့ အတွက် ၎င်းလမ်းပိုင်းကို အသုံးပြုတဲ့ ကုန်တင်ယာဥ်ကြီးများနဲ့ ခရီးသွားပြည်သူတွေအနေနဲ့ သတိထား မောင်းနှင် ကြဖို့ ပြည်သူတွေ အချင်းချင်းသတိပေးနေကြပါတယ်။