သျှမ်းပြည်တောင်ပိုင်း၊ မိုင်းပန်မြို့နယ်မှာ အွန်လိုင်းငွေလိမ်လုပ်ငန်း(ကျားဖြန့်) မှာ ပါဝင်ပတ်သက်သူ တရုတ်နိုင်ငံသား ၃ ဦး ဖမ်းဆီးရမိခဲ့တယ်လို့ စစ်အာဏာရှင်က မေလ ၇ ရက်နေ့မှာ ထုတ်ပြန် ထားပါတယ်။
မေလ ၆ ရက် ညနေပိုင်းက မိုင်းပန်မြို့နယ် အရှေ့မြောက်ဘက် မီတာ ၁၃၇၀၀ အကွာမှာ ကျားဖြန့်လုပ်ငန်း လုပ်ကိုင်သူ တရုတ်နိုင်ငံသား ၂ ဦးဖမ်းရမိပြီး စစ်ကော်စီတပ်ဖွဲ့က ဆက်လက်ရှာဖွေရာ မေလ ၇ ရက်ညနေပိုင်းမှာ မိုင်းပန်မြို့ မြောက်ဘက်မီတာ ၁၂၃၀၀ အကွာမှာ နောက်ထပ် တရုတ်နိုင်ငံ သား ၁ ဦးဖမ်းဆီးရမိခဲ့တယ်လို့ ဆိုပါတယ်။
ဖမ်းဆီးရမိသူတွေကို လိုအပ်တဲ့စစ်ဆေးမှု လုပ်ဆောင်ပြီးပါက ဥပဒေအရ အရေးယူသွားမယ်လို့ သိရပါတယ်။
ပြီးခဲ့တဲ့ မေလ ၄ ရက်နေ့ကလည်း မိုင်းပန်မြို့နယ်မှာ ကျားဖြန့်လုပ်ငန်းနဲ့ ဆက်စပ်တယ်ဆိုပြီး “ဝ”(အမျိုးသား) ၁ ဦး၊ သျှမ်း(အမျိုးသမီး) ၂ ဦးနဲ့ လားဟူ(အမျိုးသမီး) ၁ ဦး အပါအဝင် တရုတ်နိုင်ငံသား အမျိုးသား ၅၂ ဦး စုစုပေါင်း ၅၆ ဦးနဲ့အတူ ဆက်စပ်ပစ္စည်းတွေ ဖမ်းဆီးရမိခဲ့ပါတယ်။