ပြင်းထန်အယ်နီညို ရာသီဥတုဖြစ်စဥ်ကြောင့် ဓာတ်အားသုံးစွဲသူ ပြည်သူတွေကို အလှည့်ကျစနစ်နဲ့ ဝန်အားထိန်းညှိပြီး ဓာတ်အားဖြန့်ဖြူးပေးမယ့် အစီအစဥ်ကို ယနေ့ အောက်တိုဘာလ ၅ ရက်နေ့မှာ စတင်ဆောင်ရွက်သွားမယ်လို့ အာဏာသိမ်းအစိုးရရဲ့ လျှပ်စစ်နှင့် စွမ်းအင်ဝန်ကြီးဌာနက ထုတ်ပြန် ကြေညာထားပါတယ်။
ယခုအခါ မုတ်သုန်လေဆုတ်ခွာပြီး မိုးရာသီကာလကုန်ဆုံးကာ ပွင့်လင်းရာသီကို ရောက်ရှိလာခြင်းနဲ့ အတူ ပြင်းထန်အယ်နီညို ရာသီဥတုဖြစ်စဥ် သက်ရောက်မှုကြောင့် အပူချိန်သိသာစွာ မြင့်မားလာပြီး ဓာတ်အားသုံးစွဲမှုလည်း မြင့်တက်ကာ ဓာတ်အားလိုအပ်ချက် တိုးတက်မြင့်မားနေတယ်လို့ ဖော်ပြထားပါတယ်။
အပူချိန်မြင့်မားပြီး ဓာတ်အားလိုအပ်ချက် မြင့်မားလာတဲ့အချိန်မှာ ဓာတ်အားထုတ်လုပ်မှုနဲ့ သုံးစွဲမှု အချိုးမညီပါက ဓာတ်အားထုတ်စက်များ ရုတ်တရက်ရပ်တန့်တာ၊ တစ်နိုင်ငံလုံး ဓာတ်အားစနစ် ပြတ်တောက်တာ (System Breakdown) တို့ ဖြစ်ပေါ်စေနိုင်တာကြောင့် ဝန်အားထိန်းညှိဖြန့်ဖြူးမှုကို မလွဲမရှောင်သာ အနည်းဆုံးပမာဏနဲ့ ဆောင်ရွက်သွားမယ်လို့ အသိပေးကြေညာထားပါတယ်။
အခုလို အလှည့်ကျ မီးပေးမီးဖြတ်စနစ်ကြောင့် ပြင်းထန်အယ်လ်နီညို ရာသီဥတုဒဏ် ရိုက်ခတ်မှုနဲ့အတူ ပြည်သူတွေရဲ့ ကျန်းမာရေးနဲ့ နေ့စဥ်လူနေမှုဘဝ အခက်အခဲဒုက္ခတွေ ပိုမိုကြီးမားလာနိုင်တယ်လို့ ရန်ကုန်မြို့နေပြည်သူတွေက လူမှုကွန်ယက်စာမျက်နှာတွေပေါ်မှာ သုံးသပ်ပြောဆိုနေကြပါတယ်။
ရန်ကုန်မြို့တော့ အုပ်စု A နဲ့ B ခွဲကာ ဒီကနေ့ နံနက် ၅ နာရီကစပြီး လေးနာရီခြားတစ်ခါ အလှည့်ကျစနစ်နဲ့ မီးပေးသွားမယ်လို့ ရန်ကုန်လျှပ်စစ်ဓာတ်အားပေးကော်ပိုရေးရှင်း (YESC) က မနေ့ညက ကြေညာ ထားပါတယ်။
Photo – Internet