တောင်ကြီးမြို့ ၊ ဗိုလ်ချုပ်အောင်ဆန်းလမ်း( မိန်းလမ်း)ပေါ်ရှိ ပီတာ Peter ကော့တေးဘား မှ အသက်မပြည့်သေးတဲ့ အမျိုး သမီးဝန်ထမ်း ကို အသက်သေဆုံးသည်အထိ ရိုက်နက်ခဲ့သည့် ဘားပိုင်ရှင် အောင်မျိုးသူကို မေလ ၆ ရက်နေ့က သျှမ်းရှေ့ မိုင်းပျဥ်းတွင်ဖမ်းဆီးရမိကြောင်း နီးစပ်သူများထံမှ သိရသည်။
” မိုင်းပျဥ်းမှာ မိတာလို့သိရတယ် ၊ ကျိုင်းတုံ နယ်မြေရဲစခန်းကနေ တောင်ကြီး မြို့မ ရဲစခန်းကိုပဲပြန်လွဲမှာ ပေါ့ ၊ သူ့ဆိုင်ကယ်နဲ့ပဲ ဖမ်းမိတာလို့ သိရတယ် ” ဟု ပီတာဘားနှင့် နီးစပ်သူတစ်ဦး ကပြောသည်။
ပီတာ ဘားပိုင်ရှင် အောင်မျိုးသူ သည် မေလ (၄) ရက်ညနေပိုင်း က အသက် ၁၆ နှစ် အရွယ် ဝန်ထမ်းအမျိုးသမီးငယ်ကို စားသုံး သူဧည့်သည်တစ်ဦးမှ Tip(မုန့်ဖိုး) ၅၀၀၀ ကျပ် ပေးခဲ့သည့် ကိစ္စ နှင့်ပတ်သက်၍ ရိုက်နက် ထိုးကြိတ် ရာမှ အသက်သေဆုံးသည်အထိဖြစ်ပွားခဲ့ကြောင်း သိရသည် ။
သေဆုံးသူအမျိုးသမီးငယ်မှာ ညောင်ရွှေမြို့နယ်မင်းချောင်းအလယ်ရွာနေ အသက် ၁၆ နှစ်အရွယ်ရှိ မဖူးပွင့်ဝေ ဖြစ်ပြီး ပီတာဘားတွင် အလုပ်ဝင်ရောက်လုပ်ကိုင်နေ သည်မှာ၂၄ ရက်သာရှိသေးကြောင်းသိရသည်။
မဖူးပွင့်ဝေသည် ရိုက်နက်ဒဏ်ရာများကြောင့် ဦးနှောက်သွေးကြောပေါက်ကာ သေဆုံးခြင်းဖြစ်သည်ဟု မှုခင်းဆရာဝန်များက အတည်ပြုထားပြီး ရုပ်အလောင်းကို မေလ ၆ ရက်နေ့ကသင်္ဂြိုလ်ပြီးစီးခဲ့ကြောင်း သိရသည်။
ပြစ်မှုကျူးလွန်သူ ပီတာ ဘားပိုင်ရှင် အောင်မျိုးသူ သည် အမျိုးသမီး ဝန်ထမ်းများအား မကြာခဏ ဆဲဆိုကြိမ်းမောင်းတတ်ပြီး အကြမ်းဖက်ရိုက်နက်တတ်သူဟု တောင်ကြီး ၊ ညောင်ရွှေ ၊ ကလော မှ နီးစပ် သူများကပြောသည် ။ ၄င်းသည် အောင် သပြေ ဇာတိဖြစ်ပြီး မိဘ များမှာ မိတ္ထီလာ ဖက်က ဖြစ်သည်ဟုဆိုသည်။
မဖူးပွင့်ဝေ သေဆုံးသည့်ကိစ္စနှင့်ပတ်သက်၍ ကျူး လွန်သူကို ဖမ်းဆီးရမိရေး၊ ထိရောက်စွာအရေးယူနိုင်ရေးနှင့် သေဆုံးသုအတွက် တရားမျှတမှု ရရှိစေရန် သျှမ်းတောင်ဒေသခံ ပြည်သူလူထုများက တောင်းဆို ထားကြသည်။