တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် NCA (၁၁)နှစ်မြောက် နှစ်ပတ်လည် အခမ်းအနားကို ဒီကနေ့ အောက်တိုဘာ ၁၅ ရက် နံနက်ပိုင်းက နေပြည်တော် Horizon Lake View ဟိုတယ်မှာ ကျင်းပသွားခဲ့ပါတယ်။
အဲ့ဒီနှစ်ပတ်လည်အခမ်းအနားမှာ အာဏာသိမ်း သမ္မတ ဦးမင်းအောင်လှိုင် ကိုယ်တိုင်တက်ရောက်ခြင်း မရှိဘဲ Video Message နဲ့သာ ပေးပို့ပြောကြားခဲ့ကာ “ ပြည်နယ်တစ်ခုသည် လူမျိုးတစ်မျိုးတည်းရဲ့ ပိုင်ဆိုင်မှုမဟုတ်ဘဲ အဆိုပါဒေသမှာ နေထိုင်ကြတဲ့ လူမျိုးအားလုံးရဲ့ ပိုင်ဆိုင်မှုဖြစ်တယ်ဆိုတဲ့ သဘောထားကို အလေးထားဖို့လိုတယ်” လို့ပြောကြားခဲ့ပါတယ်။
ဒါ့အပြင် ပြည်တွင်းလက်နက်ကိုင် ပဋိပက္ခတွေဟာ နိုင်ငံတော်နဲ့ တိုင်းရင်းသားပြည်သူတွေအတွက် ဆုံးရှုံးနစ်နာမှုတွေကိုသာ ဖြစ်ပေါ်စေခဲ့ပြီး ဒေသဖွံ့ဖြိုးရေး၊ ပညာရေး၊ ကျန်းမာရေးနဲ့ လူမှုစီးပွားဘဝ တွေကိုလည်း ထိခိုက်စေခဲ့တာကြောင့် ငြိမ်းချမ်းရေးသည် နိုင်ငံတော်ဖွံ့ဖြိုးတိုးတက်ရေးအတွက် မရှိမဖြစ်လိုအပ်တဲ့ အခြေခံအုတ်မြစ်ဖြစ်တယ်လို့ ထည့်သွင်းပြောကြားသွားခဲ့ပါတယ်။
အခမ်းအနားမှာ NCA လက်မှတ်ရေးထိုးထားတဲ့ RCSS၊ ALP၊ DKBA၊ KNU/KNLA-PC၊ LDU နဲ့ NMSP မှ ခေါင်းဆောင်တွေလည်း အထိမ်းအမှတ်စကားအသီးသီးပြောကြားခဲ့ပါတယ်လို့ သိရပါတယ်။