ရေကြီးမှုကြောင့် ပျက်စီးသွားသည့် သျှမ်းပြည် နယ်အရှေ့ပိုင်း၊ မိုင်းဆတ်မြို့ဝင် နမ့်ခုတ်ချောင်းကူး ဆိုက်ခေါင်တံတားကို ယာယီဘေလီတံတားအဖြစ် ပြန်လည်တည်ဆောက်ကာ ရာနှုန်းပြည့်နီးပါးပြီးစီးနေပြီဖြစ်ကြောင်း သိရသည်။
အဆိုပါ တံတားသည် တောင်ကြီး-မိုင်းဆတ်- တာချီလိတ် သွားလမ်းပေါ်မှာတည်ရှိပြီး ပြီးခဲ့သည့် စက်တင် ဘာလ(၁၀)ရက်နေ့က မိုးသည်ထန်စွာ ရွာသွန်းပြီး နမ့်ခုတ်ချောင်း ရေကြီးရေလျှံဖြစ်ပေါ်မှုကြောင့် ဆိုက်ခေါင် RC ကွန်ကရစ်တံတား ပျက်စီးသွားကာ ယာယီဘေလီတံတား ပြန်လည်တည်ဆောက်ထားတာဖြစ်ပြီး ယာယီတံတား ဆောက်လုပ်မပြီးခင်မှာ ပြန်လည်ကျိုးကျပျက်စီးသွားကြောင်း သိရသည်။
” အခုဆောက်တဲ့တံတားက ဒုတိယအကြိမ်မြောက် ယာယီဘေလီတံတားဖြစ်ပါတယ်၊ တံတားအရှည်က (၁၅၀)ပေ၊ အကျယ်(၁၅)ပေလောက်ရှိမယ်၊ တံတားတည်ဆောက်ပေးတဲ့သူလည်း မနားမနေဆောက်လုပ်ပေးလို့ မကြာခင် အဆင်ပြေပြေနဲ့ ဖြတ်သန်းသွားလို့ရတော့မယ်” လို့ ဒေသခံတစ်ဦးကပြောသည်။
အဆိုပါ ယာယီတံတားတည်ဆောက် ပြီးစီးပါက ဒေသခံများအနေဖြင့် တောင်ကြီး-မိုင်းဆတ်- တာချီလိတ် သို့ ကုန်သွယ်မှု ပိုမိုလွယ်ကူမြန်ဆန်လာမည်ဖြစ်ကြောင်း သိရသည်။
