သျှမ်းပြည်မြောက်ပိုင်း၊ နမ့်ခမ်းမြို့နယ်၊ ကောင်းတပ်ကျေးရွာမှာ ဖြစ်ပွားတဲ့ ယမ်းသိုလောင်ရုံ ပေါက်ကွဲ မှုကြောင့် ပြည်သူ ၅၅ ဦး သေဆုံးပြီး ၇၀ ကျော် ဒဏ်ရာရတဲ့အပေါ် တာဝန်ခံမှု တာဝန်ယူမှု အပြည့်ရှိရန် PSLF/TNLA ခေါင်းဆောင်များကို တအာင်းပြည်ကောင်စီက တိုက်တွန်းထားပါတယ်။
ယမန်နေ့ မေလ ၃၁ ရက် နေ့လယ် ၁၂ ခွဲအချိန်ခန့်က နမ့်ခမ်းမြို့နယ်၊ ကောင်းတပ်ရွာမှာရှိတဲ့ ယမ်းသိုလောင်ရုံ ပေါက်ကွဲပြီး ပြည်သူအစုလိုက်အပြုံလိုက် သေဆုံးကာ ဘုန်းကြီးကျောင်း၊ လူနေအိမ်နဲ့ အဆောက်အအုံ အများအပြား ထိခိုက်ပျက်စီးခဲ့ရတယ်လို့ သိရပါတယ်။
ယခုဖြစ်စဥ်နဲ့ ပတ်သက်ပြီး သက်ဆိုင်ရာ တာဝန်ရှိသူ PSLF/TNLA ခေါင်းဆောင်များအနေနဲ့ ပေါက်ကွဲမှု ဖြစ်စဥ် အကြောင်းရင်းအမှန်ကို အသေးစိတ် စုံစမ်းစစ်ဆေးပြီး ဖြစ်စဥ်အပေါ် တာဝန်ယူမှု တာဝန်ခံမှု အပြည့်ရှိရန်နဲ့ တာဝန်ရှိသူတွေ ပါဝင်ပတ်သက်သူတွေကို ဥပဒေနဲ့အညီ အရေးယူဆောင်ရွက်ပေးဖို့ တအာင်းပြည်ကောင်စီ(TLC) က တိုက်တွန်းထားပါတယ်။
ပေါက်ကွဲမှုကြောင့် ထိခိုက်ပျက်စီးသွားတဲ့ကျေးရွာအတွက် ပြည်လည်ထူထောင်ရေးလုပ်ငန်းများ အမြန်ဆုံး ဆောင်ရွက်ပေးဖို့နဲ့ မည်သည့်ကိစ္စရပ်မျိုးကိုမဆို ပြုလုပ်ပါက ပြည်သူလူထု အန္တရာယ် ကင်းရှင်းရေးနဲ့ လုံခြုံရေးအား အထူးဂရုပြုလုပ်ဆောင်ဖို့လည်း တိုက်တွန်းထားပါတယ်။
ပေါက်ကွဲမှုဖြစ်ပွားတဲ့ ယမ်းပျော့တွေဟာ PSLF/TNLA ရဲ့ စီးပွားရေးဌာနမှ မိုင်းတွင်း ကျောက်ထုတ်လုပ်ရေး လုပ်ငန်းတွေမှာ အသုံးပြုဖို့ သိုလောင်ထားတဲ့ပစ္စည်းတွေ ဖြစ်တယ်လို့ TNLA ကဝန်ခံထားပါတယ်။
TNLA ရဲ့ ပေါက်ကွဲစေတတ်တဲ့ ယမ်းပစ္စည်းသိုလှောင်ရုံကို ပြည်သူတွေ အန္တရာယ်ကင်းဖို့ လူနဲ့ ဝေးတဲ့နေရာမှာ မထားဘဲ လူနေရပ်ကွက်အတွင်းမှာ ထားရှိတဲ့အတွက် ယခုလို လူတွေ အစုလိုက် အပြုံလိုက် သေဆုံးသွားတာဖြစ်ပြီး တာဝန်ရှိသူတွေကို ပြင်းပြင်းထန်ထန် အရေးယူပေးဖို့ ဒေသခံ ပြည်သူတွေက တောင်းဆိုထားပါတယ်။
နမ့်ခမ်းမြို့နယ်ကို တအာင်းတပ် TNLA က ထိန်းချုပ်ထားတာဖြစ်ပြီး ပေါက်ကွဲမှုဖြစ်တဲ့ ကောင်းတပ်ကျေးရွာမှာ အိမ်ခြေ ၃၀၀ ခန့်ရှိပြီး တအာင်းပလောင်နဲ့ ကချင်တိုင်းရင်းသား အများဆုံး နေထိုင်ကြတဲ့ ကျေးရွာဖြစ်တယ်လို့ သိရပါတယ်။
Photo – credit to owne