သျှမ်းပြည်နယ်မြို့တော် တောင်ကြီးမြို့အထွက် တောင်ကြီး−ဟိုပုံးသွားလမ်းပေါ်မှာ ရွှေမုဋ္ဌော တောင်ပေါ်မှ ကျောက်တုံးကြီး လိမ့်ကျလာပြီး ရုံးအဆောက်အအုံနဲ့ မော်တော်ယာဥ်တစ်စီး ထိခိုက်ပျက်စီးခဲ့တယ်လို့ သိရပါတယ်။
ယမန်နေ့ စက်တင်ဘာလ ၁၉ ရက် ည ၁၀ နာခွဲအချိန်ခန့်က သျှမ်းပြည်နယ်၊ သတ္တုတွင်းဦးစီးဌာနရုံးရဲ့ အနောက်ဘက်ရှိ တောင်ပေါ်မှ အလျား ၄၁၊ အနံ ၂၀၊ အမြင့် ၁၂ ပေ အရွယ်အစားရှိ ကျောက်တုံးကြီးဟာ မြေသားများအိကျပြီး လိမ့်ကျလာတယ်လို့ မြန်မာနိုင်ငံ မီးသတ်တပ်ဖွဲ့ရဲ့ ထုတ်ပြန်ချက်အရ သိရပါတယ်။
မိုးရွာသွန်းမှုကြောင့် မြေသားပျော့အိပြီး ကျောက်တုံးကြီးနဲ့အတူ ခဲ၊ရွှံ့တွေကပါ တောင်ပေါ်မှ လိမ့်ကျလာပြီး သတ္တုတွင်းဦးစီးဌာနရုံး အဆောက်အဦးနဲ့ မော်တော်ယာဥ်တစ်စီး ထိခိုက်ပျက်စီးကာ လမ်းတစ်ခြမ်းရှိ BOC စက်သုံးဆီ အရောင်းဆိုင်ရဲ့ ခြံစည်းဘက်သို့ လိမ့်ဆင်းသွားခဲ့တယ်လို့ သိရပါတယ်။
ကျောက်တုံးကြီးလိမ့်ကျလာမှုကြောင့် ပြည်ထောင်စုလမ်းမကြီး ခေတ္တပိတ်သွားခဲ့ပြီး တာဝန်ရှိသူတွေ ညတွင်းချင်း စက်ယန္တရားတွေနဲ့ ပြန်လည်ဖယ်ရှားခဲ့တာကြောင့် ည ၁၂ နာရီခန့်မှာ လမ်းပြန်ပွင့်သွားကာ လူနဲ့တိရိစ္ဆာန် ထိခိုက်မှုမရှိဘူးလို့ တောင်ကြီးမြို့ခံတစ်ဦးရဲ့ ပြောပြချက်အရ သိရပါတယ်။
ပြီးခဲ့တဲ့နှစ် မတ်လအတွင်းက လှုတ်ခတ်ခဲ့တဲ့ ငလျင်ကြောင့် အဆိုပါနေရာအနီးရှိ ကားလေးဝင်းထဲကို ကျောက်တုံးကြီး လိမ့်ကျလာတဲ့ ဖြစ်စဥ်ရှိခဲ့ပြီး ယခုလိမ့်ကျလာတဲ့ ကျောက်တုံးကြီးဟာ ယခင်နှစ်ကထက် အရွယ်အစားပိုမိုကြီးတယ်လို့ သိရပါတယ်။