သျှမ်းပြည်တောင်ပိုင်း၊ ညောင်ရွှေမြို့ရှိ နန်းကတ်ချောင်းအတွင်းသို့ ဖောင်တော်ဦးဘုရားပွဲစျေးလာရောင်းတဲ့ လူငယ်စျေးသည်တစ်ဦး ရေဆင်းကူးရာမှ ရေနှစ်သေဆုံးသွားခဲ့တယ်လို့ သိရပါတယ်။
ယမန်နေ့ အောက်တိုဘာလ ၂၁ ရက် မွန်းလွဲပိုင်း ၂ နာရီက ညောင်ရွှေမြို့ရှိ တိန်းနန်းတံတားအောက်ဘက် နန်းကတ်ချောင်းအတွင်းသို့ ပွဲစျေးလာရောင်းတဲ့ကလေး ရေဆင်းချိုးရာ အရှေ့ကမ်း အနောက်ကမ်းသို့ ကူးခတ်ရာမှ ရေနှစ်သွားခဲ့တာလို့ ဒေသခံများထံမှ သိရပါတယ်။
“ ညောင်ရွှေပွဲစျေးလာတဲ့ ဧည့်သည်ကလေး ၅ ယောက်ရေဆင်းကူးပြီး တစ်ယောက်က ရေနှစ်သေဆုံးသွားတာပါ၊ ဆုံးသွားတဲ့ကလေးက အမျိုးသားပဲ အသက် ၁၉ နှစ်အရွယ်လောက်ပဲရှိဦးမယ် ၊ ရေကူးရင် အမောဆို့သွားလို့ မြုပ်သွားတာထင်တယ် ”လို့ ဆိုပါတယ်။
ပြီးခဲ့တဲ့ အောက်တိုဘာလ ၁၆ ရက်ကလည်း ညောင်ရွှေမြို့နယ် အင်းလေးဒေသရှိ မြေနီကုန်းကျေးရွာ အနီးမှာ ဘုရားဆွဲလှေပေါ်မှ ရေထဲပြုတ်ကျပြီး လယ်သစ်အောက်ရွာမှ G-12 ကျောင်းသား ရေနှစ်သေဆုံးတဲ့ ဖြစ်စဥ်ဖြစ်ပွားခဲ့ပါတယ်။