ကရင်ပြည်နယ ဖာပွန်ခရိုင်တွင် KNU/KNLA တပ်မဟာ(၅) နှင့် စစ်ကောင်စီတို့ တိုက်ပွဲဆက်လက်ဖြစ်ပွားလျက်ရှိပြီး စက်တင်ဘာလ (၇)ရက်နေ့က (၄)နေရာတွင် တိုက်ပွဲဖြစ်ခဲ့ကြောင်း KNU မှ သတင်းထုတ်ပြန်ထားသည်။
တပ်မဟာ (၅) အတွင်း စစ်ကောင်စီတပ်များသည် ပြည်သူလူထုများအား ပစ်မှတ်ထားပြီး ပြည်သူလူထုများ နေထိုင်ရာ နေရာများအတွင်းသို့ လေကြောင်း တိုက်ခိုက်မှု (၈) ကြိမ်ပြုလုပ်ခဲ့သောကြောင့် အပြစ်မဲ့ကျောင်းသူကျောင်းသားများ ဆရာဆရာမများ (၄) ဦးခန့် သေဆုံးခဲ့ရပြီး (၇) ဦးခန့်ထိခိုက်ဒဏ်ရာခဲ့ရကာ ပြည်သူလူထုပိုင် နေအိမ် (၁၀) လုံး၊ ဘုရားရှိခိုးကျောင်း (၁) ကျောင်း၊ ဝတ်ပြုဆုတောင်းရာကျောင်းဆောင် (၁) ဆောင်တို့ ထိခိုက်ပျက်စီးခဲ့ရသည့်အပြင် ကျေးရွာပေါင်း (၆) ရွာမှ အပြစ်မဲ့အရပ်သားပြည်သူများ အသက်ဘေးလွတ်ရာသို့ထွက်ပြေးတိမ်းရှောင် နေရပြီး စာသင်ကျောင်း (၁၁) ကျောင်းလည်း ပိတ်ထားခဲ့ရသည်။
ထိုလေကြောင်းတိုက်ခိုက်မှုအတွင်း (၁) စောဖါးဒါး (၅၆)နှစ်(ကျောင်းဆရာ)၊ (၂) စောအယ်မူလား (၁၄)နှစ် (ကျောင်းသား)၊ (၃) နော်ထီးခူဖေါ (၁၆)နှစ်(ကျောင်းသူ) နှင့် (၄)စောဘိုကြီး (၁၃)နှစ် (ကျောင်းသား) တို့ (၄) ဦးမှာ သေဆုံးခဲ့ရပြီး (၁)နော်ဖေါစေးထူး (၁၄)နှစ် (ကျောင်းသူ)၊ (၂)နော်ဒါးဝါး (၁၁)နှစ် (ကျောင်းသူ)၊ (၃)စောအယ်မူလာဝါး (၉)နှစ် (ကျောင်းသား)၊ (၄)စောအယ်နေထူး (၁၅)နှစ်(ကျောင်းသား)၊ (၅)နော်မူလာကပေါ် (၁၆)နှစ် (ကျောင်းသူ) နှင့် (၆)နော်ဒါး (၂၄)နှစ်(ကျောင်းဆရာမ)တို့မှာ ထိခိုက်ဒဏ်ရာရရှိခဲ့ကြောင်း KNU မှ သတင်းထုတ်ပြန်ထားသည်။
ကရင်အမျိုးသားလွတ်မြောက်ရေးတပ်မတော် (K.N.L.A) တပ်မဟာ အမှတ် (၅) နှင့် ပူးပေါင်းတပ်ဖွဲ့ များမှ ၂၀၂၃ ခုနှစ် စက်တင်ဘာလ (၆) ရက်နေ့ နံနက် (၅း၃၀) အချိန်တွင် ခေးပူအခြေစိုက်စစ်ကောင်စီတပ်စခန်းကို တိုက်ခိုက်သိမ်းပိုက်ခဲ့ပြီးနောက် စစ်ကောင်စီတပ်များမှ ဂျက်တိုက်လေယာဉ်များကို အသုံးပြုကာ လေကြောင်းတိုက်ခိုက်မှုများကို ပြုလုပ်ခဲ့ခြင်းဖြစ်ကြောင်း သတင်းရရှိသည်။