ချင်းပြည်နယ် မင်းတပ်မြို့နယ်အတွင်း စစ်ကောင်စီမှ စစ်ကြောင်း(၂)ခုဖြင့် စစ်ရေးလှုပ်ရှားမှု ပြုလုပ်လာခြင်းကြောင့် မင်းတပ်မြို့နယ်အတွင်း တိုက်ပွဲဖြစ်ပွားလာနိုင်ကြောင်း CDF မင်းတပ်မှ သတိပေးထုတ်ပြန်ခဲ့သည်။
မင်းတပ်မြို့အခြေစိုက် ခလရ(၂၇၄) ပူးပေါင်းစစ်ကြောင်း အင်အား (၁၀၀) ဦးခန့်သည် မင်းတပ်မြို့နယ် အနောက်ဘက် လီလောင်းကျေးရွာကတဆင့် တောင်ကြောများအတိုင်း စစ်ကြောင်းနှစ်ပိုင်းခွဲပြီး လှုပ်ရှားနေသလို အခြားစစ်ကြောင်းတစ်ခုလည်း မင်းတပ်မြို့နယ်တိုက်နယ်အမှတ်(၁)ရှိ ဝီလူးရွာသစ်နှင့်ပိန်ရိန်းရွာကြား စစ်ရေးလှုပ်ရှားနေကြောင်း ဖော်ပြထားသည်။
ထို့ကြောင့် မင်းတပ်မြို့နယ်ရှိ ပြည်သူလူထုများ အသွားအလာသတိထားရန်နှင့် တောင်ယာ၊ စိုက်ပျိုးရေးလုပ်ငန်းများ ခေတ္တရပ်ဆိုင်းထားရန် သတိပေးထုတ်ပြန်ထားသည်။
မင်းတပ်မြို့နယ်အတွင်း စစ်ကောင်စီကင်းထောက်လေယာဉ်များ အဆက်အပြတ်ပျံသန်းမှုများ ပြန်လုပ်လျက်ရှိသလို တယ်လီဖုန်းလိုင်းများလည်း ဖြတ်တောက်ထားကြောင်း သတင်းရရှိသည်။
