ငြိမ်းချမ်းရေးလုပ်ငန်းစဥ် အောင်မြင်ဖို့ ယုံကြည်မှု တည်ဆောက်ခြင်းဟာ အလွန်အရေးကြီးပြီး ၎င်းအစီအမံကို လက်တွေ့ကျကျ နှစ်ဦးနှစ်ဖက်က အလေးထားဆောင်ရွက်သွားဖို့ လိုတယ်လို့ RCSS အတွင်းရေးမှူး(၁) ဗိုလ်မှူးကြီး စိုင်းငင်း ကပြောကြားခဲ့ပါတယ်။
ယမန်နေ့ စက်တင်ဘာလ ၁၅ ရက်က နေပြည်တော်ရှိ ရွှေစံအိမ်ဟိုတယ်မှာ သျှမ်းပြည်ပြန်လည် ထူထောင်ရေးကောင်စီ (RCSS) နဲ့ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) တို့ ငြိမ်းချမ်းရေးကိစ္စ တွေ့ဆုံဆွေးနွေးပွဲအတွင်း ဗိုလ်မှူးကြီး စိုင်းငင်း က အထက်ပါအတိုင်း ပြောကြားခဲ့ပါတယ်။
ဒါ့အပြင် RCSS အနေနဲ့ ငြိမ်းချမ်းရေးလုပ်ငန်းစဥ် ဆောင်ရွက်ရာမှာ တစ်ဖွဲ့ချင်းအရေးနဲ့ အားလုံးအရေး ဟန်ချက်ညီအောင် ကြိုးပမ်းဆောင်ရွက်နေပြီး အားလုံးလိုလားတောင့်တတဲ့ ဖက်ဒရယ်ပြည်ထောင်စု တည်ဆောက်နိုင်ဖို့အတွက် ငြိမ်းချမ်းရေး လုပ်ငန်းစဥ်မှတဆင့် သက်ဆိုင်ရာ Stakeholders များ အားလုံးနဲ့ လက်တွဲပူးပေါင်းဆောင်ရွက်သွားဖို့ ဆန္ဒသဘောရှိတယ်လို့ ဆိုပါတယ်။
ဆွေးနွေးပွဲမှာ ဒေသဖွံ့ဖြိုးရေးလုပ်ငန်းတွေ၊ ဆက်သွယ်ဆက်ဆံရေး လုပ်ငန်းတွေ၊ ယုံကြည်မှု တည်ဆောက်ခြင်း လုပ်ငန်းတွေ၊ ဒေသန္တရအုပ်ချုပ်ရေး လုပ်ငန်းနဲ့ အခြားကိစ္စရပ်တွေ အပြန်အလှန် ဆွေးနွေးပြီး နားလည်မှုတွေရရှိခဲ့တယ်လို့ သိရပါတယ်။
ငြိမ်းချမ်းရေးတွေ့ဆုံဆွေးနွေးပွဲမှာ သျှမ်းပြည်ပြန်လည်ထူထောင်ရေးကောင်စီ (RCSS) မှ အတွင်းရေးမှူး (၁) ဗိုလ်မှူးကြီး စိုင်းငင်း ဦးဆောင်တဲ့ ဗဟိုအလုပ်အမှုဆောင်ကော်မတီဝင်နဲ့ ဗဟိုဦးစီးကော်မတီဝင် အပါအဝင် ၈ ဦးနဲ့ NSPNC ဘက်မှ ဒုတိယဗိုလ်ချုပ်ကြီး ရာပြည့် ဦးဆောင်တဲ့ ကိုယ်စားလှယ်အဖွဲ့တွေ တက်ရောက်ခဲ့တယ်လို့ သိရပါတယ်။