ပင်းမြစ်ရေမြင့်တက်လာမှုကြောင့် ထိုင်းနိုင်ငံမြောက်ပိုင်း၊ ချင်းမိုင်မြို့မှာ ရေကြီးရေလျှံဖြစ်ပေါ်လျက်ရှိကာ Elephant Nature Park မှ ရေနစ်မြုပ်နေတဲ့ ဆင်များကို ဘေးလွှတ်ရာသို့ ရွေ့ပြောင်းဖို့ ကယ်ဆယ်ရေးတွေ လုပ်ဆောင်နေကြောင်း ထိုင်းမီဒီယာများက ဖော်ပြထားသည်။
ချင်းမိုင်မှာ စံချိန်တင်ရေကြီးမှုကြောင့် မယ့်တန်ဆင်စခန်းမှ ဆင်အကောင်ရေ ရာနဲ့ချီ အရေးပေါ်ပြောင်းရွှေ့နေရပြီး တိရစ္ဆာန်ထောင်ချီအတွက် အကူအညီလိုအပ်နေကြောင်း Elephant Nature Park မှ ဖော်ပြထားသည်။
” စံချိန်တင်တက်လာတဲ့ Ping မြစ်ရေကြောင့် အခုဆိုရင် ချင်းမိုင် Bus Station၊ ချင်းမိုင်ဘူတာ နှစ်ခုလုံး ရေဝင်နေပါပြီ၊ ပင်းမြစ်ဘေးက အနိမ့်ပိုင်းရပ်ကွက် တွေဆို ရေမြုပ်လို့ ဘာပစ္စည်းမှ မရွေ့ပြောင်းလိုက်ရဘူး” လို့ ထိုင်းရောက်မြန်မာတစ်ဦးက ပြောသည်။
အခုလိုရေကြီးမှုကြောင့် ရေကြီးရေလျှံဖြစ်နေတဲ့ လမ်းမအချို့များကို အာဏာပိုင်တွေက ပိတ်ထားကြောင်း သိရသည်။
ထိုင်းနိုင်ငံမှာ ယခုနှစ် သြဂုတ်လ(၁၆)ရက်မှ အောက်တိုဘာလ(၅)ရက်အတွင်း ရေကြီးရေလျှံမှုကြောင့် လူ ၄၉ ဦး သေဆုံးခဲ့ကြောင်း ထိုင်းသဘာဝဘေးကြိုတင်ကာကွယ်ရေးနှင့် လျော့ပါးရေးဦးစီးဌာနက ထုတ်ပြန်ထားကြောင်း သိရှိရပါသည်။
