သျှမ်းပြည်နယ်တွင် ထွက်ရှိသော ကြံများကို အဓိကဝယ်ယူလျက်ရှိသည့် ငွေရည်ပုလဲသကြားကုမ္ပဏီလီမိတက်သည် အောက်တိုဘာလ (၃) ရက်နေ့က၂၀၂၃-၂၀၂၄ ကြံရာသီအတွက် ကြံတစ်တန်လျှင် စက်ရုံအရောက် (၁၂၀,၀၀၀) ကျပ်ဖြင့် ဝယ်ယူမည်ဟု ထုတ်ပြန်သတ်မှတ်ခဲ့သည်။ လွန်ခဲ့သော ဩဂုတ်လကပင် ကြံတစ်တန်လျှင် (၁၁၀၀၀) ကျပ်ဖြင့်သာ ဝယ်ယူခဲ့သော်လည်း ယခုအခါ ကြံတစ်တန်လျှင် (၁၂၀,၀၀၀) ကျပ်အထိ တိုးမြှင့်ခဲ့ခြင်းဖြစ်သည်။
သို့သော် ယခုနှစ်တွင် ကုန်ဈေးနှုန်းအဆမတန်မြှင့်မားလာမှုကြောင့် ကြံစိုက်ပျိုးရာတွင် အသုံးပြုသော ဓာတ်မြေဩဇာတစ်အိတ်၏ တန်ဖိုးသည် (၁၃၀,၀၀၀) ကျပ်ရှိသည်ဟုဆိုသည်။
“ ဖေဖော်ဝါရီလတုန်းကတော့ တရုတ်ပြည်ကနေ မြန်မာနိုင်ငံကကြံတွေကို ဝယ်ယူပေးနေပြီးတော့ တစ်တန်ကို (၂) ကျပ်သိန်းအထိ ပေါက်ဈေးရှိတယ်ပြောတယ်။ ဒါပေမယ့် တောင်သူတွေက ဈေးကွက်ကိုလည်းမရှာတတ်သလို ငွေရည်ပုလဲကုမ္ဗဏီက ထုတ်ပေးထားတဲ့စိုက်စရိတ်နဲ့စိုက်ထားရတာဆိုတော့ သူတို့ကိုပဲ ပြန်ရောင်းရတာပေါ့။ သူတို့ကပေးတဲ့ဈေးအတိုင်းပဲရောင်းရတာဆိုတော့ တကယ်တမ်းပြောရင် ဒီနှစ်ကုန်ဈေးနှုန်းအရမ်းတက်နေတာနဲ့ မြေဩဇာတစ်အိတ်ကို (၁၃၀၀၀၀) ကျပ်အထိ ပေးဝယ်ရတယ်။ အခုက ကြံတစ်တန်ကို (၁၂၀၀၀၀) ကျပ်ဆိုတော့ မြေဩဇာတစ်အိတ်ဖိုးတောင်မရှိပါဘူး။ ဒါတောင် ကားခနဲ့လူငှားခက ရှိသေးတယ်။” ကျောက်မဲမြို့နယ်က ကြံစိုက်တောင်သူတစ်ဦးမှ ပြောပြသည်။
ငွေရည်ပုလဲကုမ္ပဏီအနေဖြင့် ကြံစိုက်တောင်သူများအတွက် ကြံစိုက်ဧကကိုတွက်ချက်ပြီး အတိုးမဲ့စနစ်ဖြင့် ငွေကြိုထုတ်ချေးပေးလျက်ရှိပြီး ကြံပေါ်ချိန်ရောက်မှ ပြန်လည်နုတ်ယူခြင်းဖြစ်သည်။
