အရှေ့အလယ်ပိုင်းဒေသထွက် ရေနံစိမ်း စည်ပေါင်း ၇၀၀,၀၀၀ ခန့် တင်ဆောင်လာသည့် ရေနံတင် သင်္ဘောတစ်စင်းသည် ဘန်ချက်ကော်ပိုရေးရှင်း (Bangchak Corporation)၏ သီရိရာချာ(Si Racha) ရေနံချက်စက်ရုံဆိပ်ကမ်းသို့ ဘေးကင်းစွာ ဆိုက်ရောက်လာပြီဖြစ်ကြောင်း ကုမ္ပဏီက ပြောကြားခဲ့ကြောင်း ထိုင်းသတင်းများက ရေးသားဖော်ပြထားသည်။
အဆိုပါသင်္ဘောသည် အိန္ဒိယသမုဒ္ဒရာကို ဖြတ်ကျော်မောင်းနှင်လာခဲ့ပြီးနောက် ဧပြီလ ၇ ရက် ညပိုင်းတွင် သီရိရာချာရှိ ဘန်ချက်ရေနံချက်စက်ရုံသို့ ရောက်ရှိခဲ့ခြင်းဖြစ်ပြီး စားသုံးသူများအတွက် စက်သုံးဆီထုတ်ကုန်များ ပြတ်တောက်မှုမရှိစေရန် အဆိုပါရေနံစိမ်းများကို ချက်လုပ်သွားမည် ဖြစ်ကြောင်း သိရသည်။
ဘန်ချက်ကုမ္ပဏီ၏ ရေနံတင်သင်္ဘောသည် မတ်လ ၁၁ ရက်နေ့ကတည်းက ပါရှန်းပင်လယ်ကွေ့တွင် ကျောက်ချရပ်နားခဲ့ရပြီး ထိုင်း၊ အီရန်နှင့် အိုမန်နိုင်ငံတို့၏ သံတမန်ရေးရာ ညှိနှိုင်းမှုများ ပြုလုပ်ပြီးနောက်မှသာ ရေလက်ကြားကို ဖြတ်သန်းခွင့် ရရှိခဲ့ခြင်းဖြစ်ကြောင်း သိရသည်။
ကုမ္ပဏီပိုင် ရေနံချက်စက်ရုံ ၂ ခု ဖြစ်သည့် ဖရာခနောင် (Phra Khanong) နှင့် သီရိရာချာ စက်ရုံများသို့ ရေနံစိမ်းပေးပို့မှုများသည် သတ်မှတ်ထားသည့် အစီအစဉ်အတိုင်း ရှိနေဆဲဖြစ်ကြောင်း ဘန်ချက်ကုမ္ပဏီ က ပြောကြားခဲ့သည်။
ထို့အပြင် ကုမ္ပဏီအနေဖြင့် လက်ရှိတွင် ၂ လစာခန့် ထုတ်လုပ်နိုင်မည့် ရေနံစိမ်း အရန်သင့်ရှိထားပြီး စွမ်းအင်ထောက်ပံ့မှု တည်ငြိမ်စေရန်အတွက် အခြေအနေကို အနီးကပ် ဆက်လက်စောင့်ကြည့်သွားမည် ဖြစ်ကြောင်း ကုမ္ပဏီက ထပ်လောင်းပြောကြားခဲ့ကြောင်း သိရပါသည်။
ကိုးကား − Thai Enquirer