သျှမ်းပြည်နယ်မြောက်ပိုင်း၊ မိုင်းရယ်မြို့နယ်မှာ ကျားဖြန့် အွန်လိုင်းလိမ်လည် လောင်းကစားလုပ်ငန်း လုပ်ကိုင်နေတဲ့ တရုတ်နိုင်ငံသား ၃၃၀ ဦးအား လုပ်ငန်းသုံး ဆက်စပ်ပစ္စည်းများနဲ့အတူ ဖမ်းဆီးရမိခဲ့ တယ်လို့ စစ်ကော်မရှင်က ယမန်နေ့က ထုတ်ပြန်ထားပါတယ်။
အဲ့ဒီကျားဖြန့်လုပ်ငန်း လုပ်ကိုင်သူကို ဇန်နဝါရီလ ၃ ရက် နံနက်ပိုင်းက မိုင်းရယ်မြို့ရဲ့ အရှေ့တောင်ဘက် ၃၅ ကီလိုမီတာခန့်အကွာ ဟိုက်ပုကျေးရွာအနီးမှာ ဖမ်းဆီးရမိခဲ့တာလို့ ဆိုပါတယ်။
ဖမ်းဆီးရမိမှုများထဲမှာ အဖွဲ့ ၆ ဖွဲ့မှ တရုတ်နိုင်ငံသား အမျိုးသား ၃၂၁ ဦး၊ အမျိုးသမီး ၉ စုစုပေါင်း ၃၃၀ ဦးနဲ့အတူ မိုးကာအစိမ်းစနဲ့ ဆောက်လုပ်ထားတဲ့ အဆောက်အအုံ ၁၅ လုံး၊ ဆောက်လုပ်ဆဲ ၁၀ လုံး၊ မီးစက် ၂ လုံး၊ ဖုန်းမျိုးစုံ ၂၀၈ လုံး၊ ALL-IN-ONE ကွန်ပျူတာ ၈၆ လုံး၊ Laptop ၇ လုံး၊ Star Link ၂၃ လုံးနဲ့ မော်တော်ယာဉ်မျိုးစုံ ၁၀ စီး တို့ကို တွေ့ရှိဖမ်းဆီးထိန်းသိမ်းနိုင်ခဲ့တယ်လို့ ဖော်ပြထားပါတယ်။
သိမ်းဆည်းရမိတဲ့ ကျားဖြန့် ဆက်စပ်ပစ္စည်းများကို လုပ်ထုံးလုပ်နည်းနဲ့အညီ ဆက်လက်ဆောင်ရွက် သွားမှာဖြစ်ပြီး ဖမ်းဆီးရမိတဲ့ တရုတ်နိုင်ငံသားကို ဥပဒေနဲ့အညီ ထိထိရောက်ရောက် အရေးယူဆောင်ရွက်သွားမှာဖြစ်သလို နောက်ကွယ်မှ ပါဝင်ပါတ်သက်သူတွေကိုလည်း ဆက်လက် ဖော်ထုတ်အရေးယူသွားမယ်လို့ ဆိုပါတယ်။
ပြီးခဲ့တဲ့ ဇန်နဝါရီလ ၂၉ ရက်ကလည်း သျှမ်းတောင်ရှိ ကွန်ဟိန်းမြို့နယ်ထဲမှာ တရုတ်ကျားဖြန့် ၂၃၃ ဦးနဲ့ အတူ ကျားဖြန့်ဆက်စပ်ပစ္စည်းများ ဖမ်းဆီးရမိခဲ့ကြောင်း သိရပါတယ်။