လဲချားမြို့နယ်အတွင်း စစ်ကောင်စီတပ်နှင့် SSPP တို့ တိုက်ပွဲပြင်းထန်စွာဖြစ်ပွား လက်နက်ကြီးများဖြင့်အပြန်အလှန်ပစ်ခတ်နေ

သျှမ်းပြည်နယ်တောင်ပိုင်း လဲချားမြို့နယ်အတွင်း စစ်ကောင်စီတပ်နှင့် SSPP အဖွဲ့တို့ ယမန်နေ့ညနေပိုင်းခန့်က စတင်ပြီး တိုက်ပွဲစတင်ဖြစ်ပွားခဲ့ကြောင်း သတင်းရရှိသည်။

ယနေ့ နံနက် (၆) နာရီခန့်ကစတင်ပြီး လဲချားမြို့နယ် ဟိုင်းဆိုင်ကျေးရွာအုပ်စု နမ့်ပေါက်ရွာအနီးရှိ SSPP ကုန်းစခန်းတစ်ခုအား စစ်ကောင်စီမှ လက်နက်ကြီးဖြင့်စတင်ပစ်ခတ်တိုက်ခိုက်ခဲ့သည်ဟုဆိုသည်။ ထို့နောက် SSPP ဘက်မှလည်း လက်နက်ကြီးများဖြင့် ပြန်လည်ပစ်ခတ်တိုက်ခိုက်မှုကြောင့် တိုက်ပွဲပြင်းထန်လျက်ရှိပြီး ယခု သတင်းဖော်ပြချိန်အထိ လက်နက်ကြီးသံများ ရံဖန်ရံခါထွက်ပေါ်လျက်ရှိသည်။

“ တိုက်ပွဲကတော့ မနေ့ညကတည်းက စတာပါ။ စစ်ကောင်စီဘက်ကနေ SSPP တပ်တွေနေတဲ့ စခန်းကုန်းကို လက်နက်ကြီးတွေနဲ့စပစ်တယ်။ SSPP ဘက်ကနေလည်း လက်နက်ကြီးတွေနဲ့ပြန်ပစ်တော့ မနေ့ညကတည်းက တိုက်ပွဲသံတွေဆူညံနေတယ်။ ဒီဘက်မှာက SSPP တပ်ဖွဲ့ဝင်တွေ ထောင်ဂဏာန်းလောက်ရှိနေတော့ တိုက်ပွဲကတော့ ပြင်းထန်လာမယ့် သဘောရှိတာပေါ့။ ဒီမနက်ဆိုရင် စစ်ရဟတ်ယာဉ်တွေလည်း လဲချားမြို့နယ်အတွင်း ပျံဝဲနေတာတွေရှိတယ်။ တိုက်ပွဲကတော့ ၃ နေရာလောက်ဖြစ်နေတယ် တစ်နေရာကတော့ နမ့်တိန်းချောင်းကူးတံတားမှာပါ။ စစ်ကောင်စီတပ်ဖွဲ့တွေက အင်အားအလုံးအရင်းနဲ့ SSPP တပ်ဖွဲ့တွေရှိတဲ့ဘက်ကို ထိုးစစ်ဆင်နေပြီလို့ ပြောလို့ရတယ်။” ဟု လဲချားမြို့နယ်ရှိ ဒေသခံတစ်ဦးက ပြောသည်။

လဲချားမြို့နယ်အတွင်းရှိ SSPP တပ်ဖွဲ့ဝင်များ ပြန်လည်ဆုတ်ခွာပေးရန် စစ်ကောင်စီမှ ဖိအားပေးတောင်းဆိုခြင်းမှ စပြီး ၂ ဖက်တပ်များ စစ်ရေးတင်းမာလာကာ တိုက်ပွဲဖြစ်ပွားလာခြင်းဖြစ်သည်။

တိုက်ပွဲမစတင်မီ ကင်းလှည့်နေသော SSPP တပ်ဖွဲ့ဝင်များအား စစ်ကောင်စီတပ်ဘက်မှ စတင်ပစ်ခတ်တိုက်ခဲ့ပြီး SSPP တပ်သားတစ်ဦး သေဆုံးခဲ့သည်ဟု သိရသည်။

တိုက်ပွဲနှင့်နီးသော ရွာခံများ ဘေးလွတ်ရာသို့ ထွက်ပြေးတိမ်းရှောင်နေပြီဖြစ်ကြောင်း သတင်းရရှိသည်။