လားရှိုးမြို့အခြေစိုက် သံချပ်ကာတိုက်ခိုက်ရေးတပ်ရင်း နှင့် ဆက်သွယ်ရေးတပ်ရင်းအပါအဝင် စစ်ကောင်စီတပ်စခန်းများကို တော်လှန်ရေးတပ်များထပ်မံသိမ်းပိုက်

သျှမ်းပြည်နယ်မြောက်ပိုင်း၊ လားရှိုးမြို့ရှိ ကျန်ရှိနေသော စစ်ကောင်စီ တပ်စခန်းများကို ဆက်လက်တိုက်ခိုက်သိမ်းပိုက်နိုင်ခဲ့ကြောင်း ဗမာပြည်သူ့လွတ်မြောက်ရေးတပ်တော်(BPLA)က ဇူလိုင်လ(၂၉)ရက်နေ့ ညနေပိုင်းမှာ သတင်းထုတ်ပြန်ခဲ့ပါသည်။

ဇူလိုင် (၂၈)ရက်နှင့် (၂၉)ရက်နေ့များတွင် မြန်မာအမျိုးသားဒီမိုကရက်တစ် မဟာမိတ်တပ်မတော် (MNDAA) နှင့် ဗမာပြည်သူ့လွတ်မြောက်ရေးတပ်တော်(BPLA) တို့ပါဝင်သော မဟာမိတ်တပ်ပေါင်းစုက လားရှိုးမြို့အခြေစိုက် ဆက်သွယ်ရေးတပ်ရင်း၊ အမှတ်(၇၀၀၅) သံချပ်ကာတိုက်ခိုက်ရေးတပ်ရင်း၊ အမှတ်(၂၄၂) စစ်လက်နက်တပ်ခွဲနှင့် စစ်တပ်ဂေါက်ကွင်းတို့မှ ရန်သူများကို အပြီးသတ်သိမ်းပိုက်ခဲ့ ကြောင်း BPLA က ထုတ်ပြန်ခဲ့ပါသည်။

MNDAA က ဇူလိုင်လ(၂၅)ရက်တွင် လားရှိုးမြို့ရှိ စစ်ကောင်စီတပ်များကို သိမ်းပိုက်နိုင်ပြီ ဖြစ်ကြောင်း ကြေညာကာ မြို့တွင်းအုပ်ချုပ်ရေး ဖော်ဆောင်မည်ဟု အသိပေးပြီးနောက် စစ်ကောင်စီ လက်ကျန် တပ်စခန်းများအား ဆက်လက်တိုက်ခိုက် သိမ်းပိုက်နိုင်ခဲ့ခြင်းဖြစ်ကြောင်း သိရှိရပါသည်။