ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
ယနေ့ (၉.၁၁.၂၀၂၃) ရက်နေ့ နံနက် (၇) နာရီဝန်းကျင်ခန့်တွင် သျှမ်းပြည်နယ်မြောက်ပိုင်း လားရှိုးမြို့နယ် မိုင်းတိမ်ကျေးရွာအုပ်စုရှိ ဘုန်းကြီးကျောင်းပေါ်သို့ လက်နက်ကြီးကျည် ကျရောက်ပေါက်ကွဲခဲ့ကြောင်း သတင်းရရှိသည်။
၎င်းလက်နက်ကြီးကျည်သည် မည်သည့်အဖွဲ့က ပစ်ခတ်သည်ကိုမသိရပါ။ လက်နက်ကြီးကျရောက်ပေါက်ကွဲမှုကြောင့် အဆိုပါဘုန်းကြီးကျောင်းတွင် ရောက်ရှိတိမ်းရှောင်နေသော စစ်ဘေးရှောင်အသက် (၁၂) အရွယ် အေးနောင့်အွန်နှင့်အသက် (၆၀) အရွယ် ပါမွန်း တို့ (၂) ဦး ဗုံးစထိမှန်ပြီး ပွဲချင်းပြီးသေဆုံးခဲ့ရသည်။
ဒါ့အပြင် အသက် (၄၀) အရွယ်ရှိ နန်းရွှေ ဟုခေါ်သော အမျိုးသမီးတစ်ဦးလည်း လက်နက်ကြီးကျည်ထိမှန်ပြီး ခြေထောက်ပြတ်ကာ ဆေးရုံအရောက်တွင် အသက်ဆုံးရှုံးခဲ့ရသည်ဟုဆိုသည်။
“ မနက်အစောကြီးကတည်းက စစ်ဘေးရှောင်တွေရောက်နေတဲ့ ဘုန်းကြီးကျောင်းအပေါ်ကို လက်နက်ကြီး ကျရောင်ပေါက်ကွဲလို့ စစ်ဘေးရှောင် (၂) ဦး သေဆုံးပြီး တစ်ဦးခြေထောက်ပြတ်ရှဒဏ်ရာရတယ်ဆိုပြီး ကျနော်တို့ကိုအကြောင်းကြားလာလို့ သွားရောက်ကူညီပေးရတယ်။ ခြေထောက်ပြတ်သွားတဲ့တစ်ယောက်လည်း ဆေးရုံရောက်ပြီး ဆုံးသွားပြီ။ မနက် (၆) နာရီကတည်းက လက်နက်ကြီးတွေနဲ့အပြန်အလှန်ပစ်နေကြတော့ ဘယ်အဖွဲ့ရဲ့ လက်နက်ကြီးဖြစ်တယ်ဆိုတာကိုတော့ မသိရသေးဘူး။ ကျောင်းထဲမှာ မပေါက်ကွဲသေးတဲ့ လက်နက်ကြီးကျည်တစ်လုံးလည်းရှိနေသေးတယ်။” ဟု စစ်ဘေးရှောင်များကို ကူညီပေးနေသော ပရဟိတအဖွဲ့ဝင်တစ်ဦးက ပြောပြသည်။
လားရှိုးမြို့နယ်တွင် မြောက်ပိုင်းမဟာမိတ်အဖွဲ့များ ၁၀၂၇ စစ်ဆင်ရေး စတင်ဖော်ဆောင်သော နေ့ကစတင်ပြီး ယနေ့အထိ စစ်ဘေးရှောင်မိဘပြည်သူ တစ်သောင်းကျော်ရှိနေပြီဖြစ်ကြောင်း သတင်းရရှိသည်။
