လားရှိုးမြို့တွင်း MNDAA နှင့်ပူးပေါင်းအဖွဲ့များ ကင်းလှည့်နေပြီဖြစ်ပြီး ရှင်းလင်းရေးလုပ်ဆောင်နေဟုဆို

သျှမ်းပြည်နယ်မြောက်ပိုင်း၏ မြို့တော် လားရှိုးမြို့ရှိ စစ်ကောင်စီ တပ်စခန်းများစွာကို MNDAA က တိုက်ခိုက်သိမ်းပိုက်နိုင်ပြီးနောက် ယနေ့တွင် မြို့တွင်း ကင်းလှည့်ခြင်းနှင့် ရှင်းလင်းရေးလုပ်ဆောင်နေကြောင်း သိရသည်။ MNDAA တပ်သားများသည် လားရှိုးမြို့ရှိ မြို့မဈေး၊ ဆေးရုံကြီး၊ မြို့တော်ခန်းမ စသည့်နေရာများ၌ ကင်းလှည့်နေသော ဓာတ်ပုံများအား ယနေ့တွင် MNDAA အဖွဲ့က ဖော်ပြလာသည်။

တစ်ဖက်တွင်လည်း လားရှိုးမြို့၌ စစ်ကောင်စီတပ်သားများစွာ ကျန်ရှိနေသေးပြီး MNDAA နှင့် တိုက်ပွဲဆက်လက်ဖြစ်ပွားနေသလို လေယာဉ်ဖြင့် ဗုံးကြဲတိုက်ခိုက်မှုလည်း နေ့စဉ်ပြုလုပ်နေသည်။

အလားတူ ယနေ့ညနေပိုင်းတွင် လားရှိုးမြို့နယ် ဟိုပိတ်ကျေးရွာရှိ စစ်ကောင်စီတပ်ဖြစ်သော ၉၁၂ အင်ဂျင်နီယာ စစ်မြေပြင်တပ်ရင်းနှင့် ခလရ ၄၁ တပ်ရင်းတို့အား MNDAA က သိမ်းပိုက်ထားပြီဖြစ်ပြီး သိမ်းဆည်းရမိသော လက်နက်ခဲယမ်းများအား သယ်ထုတ်နေကြောင်း သိရသည်။