ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
သျှမ်းပြည်နယ်မြောက်ပိုင်း မူဆယ်မြို့နယ်တွင် ယနေ့နံနက် (၇) နာရီဝန်းကျင်ခန့်က စတင်ပြီး စစ်ကောင်စီတပ်မှ လွယ်တေးမိန်းတောင်ထံ လက်နက်ကြီးကျည် (၃) ချက်စတင်ပစ်ခတ်ရာမှ တိုက်ပွဲများ ဆက်လက်ပြင်းထန်စေလျက်ရှိသည်။ လက်နက်ကြီးကျရောက်ပေါက်ကွဲပြီးနောက် (၂) ဖက်သောတပ်များကလက်နက်ကြီး လက်နက်ငယ်များဖြင့် အပြန်အလှန်ပစ်ခတ်တိုက်ခိုက်မှုများ ပြုလုပ်ခဲ့ကြသည်။
နံနက် (၁၁) နာရီဝန်းကျင်ခန့်မှ မွန်းလွဲ (၁) နာရီအချိန်အထိ တိုက်ပွဲများပြင်းထန်နေသောကြောင့် မူဆယ်-နမ့်ခမ်းကားလမ်းမတစ်လျောက် ကားလမ်းပိတ်ဆို့မှုပင်ဖြစ်ပေါ်ခဲ့သည်။
“နံနက်ပိုင်းအစောကြီးကတည်းက စစ်ကောင်စီတပ်ဖက်ကနေ လက်နက်ကြီး (၃) ချက်စတင်ပစ်ခတ်ရာကနေ တစ်နေ့လုံးတိုက်ပွဲသံတွေကြားနေရတုန်းပဲ။ ဝိန်းနန်းရွာကိုတော့ စစ်ကောင်စီတပ်တွေ ဝင်ရောက်နေရာယူထားပြီလို့သိရပြီးတော့ ဝိန်းနန်းရွာက TNLA အရာရှိတွေက စိုက်ပျိုးထားတဲ့ ငှက်ပျောခြံထဲမှာ လူအယောက် (၄၀) လောက် ပိတ်မိနေတယ်လို့ကြားရတယ်။ TNLA စစ်သားတွေလား ရိုးရိုးအရပ်သားတွေလား ဆိုတာတော့ မသိရသေးဘူး။” ဟု မူဆယ်ဒေသခံတစ်ဦးက ပြောပြသည်။
ဒါ့အပြင် (၂) ဖက်တပ်များက လက်နက်ကြီးများဖြင့် အပြန်အလှန်ပစ်ခတ်မှုကြောင့် ဆုတောင်းတောင်ဘုန်းကြီးကျောင်းအား ထိမှန်ခဲ့ပြီး ကျောင်းထိုင်ဘုန်းကြီးတစ်ပါး ထိခိုက်ဒဏ်ရာရရှိခဲ့ကြောင်း သတင်းရရှိသည်။
