ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
သျှမ်းပြည်နယ်တောင်ပိုင်း မိုင်းနောင်မြို့နယ်အနီးတစ်ဝိုက်တွင် SSPP ပါဝင်သည့် မြောက်ပိုင်းမဟာမိတ်အဖွဲ့နှင့် RCSS အဖွဲ့တို့ စစ်ရေးတင်းမာလျက်ရှိပြီး ယနေ့ (၁၂.၄.၂၀၂၃) ရက်နေ့ နံနက်ပိုင်းခန့်၌ သေနတ်သံများ စတင် ကြားနေရကြောင်း မိုင်းနောင်ဒေသခံများက ဆိုသည်။
မိုင်းနောင်မြို့ တောင်ဘက် ဝမ်တုံနှင့်လုံယမ်းရွာအနီး၌ သေနတ်သံများကြားနေရခြင်းဖြစ်ပြီး SSPP ဘက်မှ စစ်အင်အားများ ဖြည့်တင်းလျက်ရှိကြောင်း သိရသည်။
(၁၀.၄.၂၀၂၃)ရက်နေ့တွင်လည်း မိုင်းနောင်မြို့နယ် ဝမ်တုံကျေးရွာအုပ်စု ဖိုင်မောင့်ရွာကို SSPP တပ်သားများမှ ဝင်ရောက်ရှာဖွေခဲ့ရာတွင် ဒေသခံရွာသူရွာသားများ ထိတ်လန့်ပြီး ထွက်ပြေးခဲ့ရသည်။ ထွက်ပြေးကြသော ကျေးရွာခံ ရွာသူရွာသားများကို SSPP တပ်သားများ လိုက်လံပစ်ခတ်ဖမ်းဆီးရာမှ ရွာခံတစ်ဦးဖြစ်သူ စိုင်းညာအား ပစ်ခတ်မိခဲ့ပြီး နေရာတွင်ပင် သေဆုံးခဲ့ရသည်။
(၁၁.၄.၂၀၂၃) ရက်နေ့တွင် SSPP အဖွဲ့မှ ဆန်တစ်တင်း၊ ဝက်သား (၁၀၀) ပိဿာ၊ ပစ္စည်းထမ်းသူ (၆) ဦးအား ဝမ်တုံရွာသားများထံ တောင်းဆိုခဲ့ကြောင်း သတင်းရရှိသည်။
တိုက်ပွဲနှင့်ပတ်သက်၍ (၂) ဖက်အဖွဲ့မှ ထုတ်ပြန်ခြင်းမရှိသေးသော်လည်း ဒေသခံများမှ တိုက်ပွဲပြင်းထန်မည်ကို စိုးရိမ်ထိတ်လန့်လျက်ရှိသည်။
