ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
၂၀၂၃ ခုနှစ် ဖေဖော်ဝါရီလ (၂၁) ရက်နေ့ ယမန်နေ့က အပြည်ပြည်ဆိုင်ရာ မိခင်ဘာသာစကားနေ့တွင် အမျိုးသားညီညွတ်ရေးအတိုင်ပင်ခံကောင်စီနှင့် အမျိုးသားညီညွတ်ရေးအစိုးရ ပညာရေးဝန်ကြီးဌာန တို့က တိုင်းရင်းသားမိခင်ဘာသာစကားအခြေပြု ဘာသာစကားစုံ သင်ကြားရေးနှင့် ပတ်သက်၍ ထုတ်ပြန်ကြေညာချက် ထုတ်ပြန်ခဲ့သည်။
အဆိုပါ ထုတ်ပြန်ချက်တွင် မြန်မာနိုင်ငံတွင် စစ်အုပ်ချုပ်မှုအောက်ကို နှစ်ပေါင်းများစွာ ခံစားခဲ့ရရာ၊ တိုင်းရင်းသားဘာသာစကားများဆိုင်ရာ အခွင့်အရေးများနှင့် ဖွံ့ဖြိုးခွင့်ကို လျစ်လျူရှူခံခဲ့ရသည်။ မိခင်ဘာသာစကားနှင့် ယဉ်ကျေးမှုကို ကိုယ်စားပြုသော စာပေများ သင်ရိုးညွှန်းတမ်းများကို သင်ကြားခွင့်မရခဲ့ပါ။
မိခင်ဘာသာစကားအခြေပြု ဘာသာစကားစုံသင်ကြားရေး (Mother Tongue-Based Multilingual Education -MTB-MLE) အစီအစဉ်များ ဆောင်ရွက်ခြင်းသည် ဘာသာစကားများ ရှင်သန်ရန် အားပေးခြင်း၊ ကျောင်းသား/သူ များ၏ မိခင်ဘာသာစကား (L-1) ဖွံ့ဖြိုးရန်ကူညီပေးခြင်း၊ ဒေသသုံး/နိုင်ငံသုံး၊ နိုင်ငံတကာဆိုင်ရာ ဘာသာစကားများ တတ်မြောက်ရန်လည်း အထူးအကူအညီပြုကာ ကျောင်းသား/သူများ၏ စဉ်းစားတွေးခေါ်မှုနှင့် ကျောင်းပညာသင်ယူခြင်းကို များစွာ အထောက်အပံ့ပြုကြောင်း ခိုင်မာသော သုတေသနများ ရှိပြီးဖြစ်သည်။
ဖက်ဒရယ်ဒီမိုကရေစီပဋိညာဉ် (အစိတ်အပိုင်း ၁) လူမှုဆိုင်ရာအခွင့်အရေး ပုဒ်မ(၃၈) ၊ ယဉ်ကျေးမှုဆိုင်ရာ အခွင့်အရေးပုဒ်မ (၄၃) အရ တိုင်းရင်းသားဘာသာစကား၊ မိခင်ဘာသာစကား သင်ကြားရေးကိစ္စရပ်များအား အာမခံချက်ကို အတိအလင်းဖော်ပြထားပြီး ဖက်ဒရယ်ဒီမိုကရေစီ နိုင်ငံတော်အတွက် အလွန်အရေးကြီးသောပညာရေးဥပဒေဆိုင်ရာ အစပျိုးခြင်း ဖြစ်သည်။
အမျိုးသား ညီညွတ်ရေးအစိုးရ၊ ပညာရေးဝန်ကြီးဌာနအနေဖြင့် ကြားကာလတွင် အနာဂတ်အတွက် ကြိုတင်ပြင်ဆင်ရန် မိခင်ဘာသာစကားအခြေပြု ပညာသင်ကြားရေးစနစ်များကို လေ့လာဖော်ထုတ် ခြင်း၊ သုတေသနပြုခြင်း၊ လက်တွေ့အကောင်အထည်ဖော်ဆောင်ရွက်ခြင်း၊ ဒေသအလိုက်မူဝါဒဖွံ့ဖြိုးမှုလုပ်ငန်းများကို အားပေးထောက်ခံကာ အတတ်နိုင်ဆုံး ပံ့ပိုးကူညီသွားမည် ဖြစ်သည်။
မိခင်ဘာသာစကား ဖွံ့ဖြိုးတိုးတက်ရေး လုပ်ငန်းများကို လုပ်ဆောင်နေကြသော တိုင်းရင်းသား ပညာရေးဌာနများနှင့် စာပေယဉ်ကျေးမှုအဖွဲ့အစည်းများ ပြည်တွင်းပြည်ပ MTB-MLE ကျွမ်းကျင်ပညာရှင်များ၊ မူဝါဒဆိုင်ရာ ကျွမ်းကျင်သူများ MTB-MLE ဖွံ့ဖြိုးရေး လုပ်ဆောင်နေသော ပြည်တွင်းပြည်ပအစိုးရမဟုတ်သည့် အဖွဲ့အစည်းများ (INGOs၊ NGOs) အရပ်ဖက်လူမှုအဖွဲ့အစည်းများ (CSOs) ၊ ဘာသာရေးအခြေပြုအဖွဲ့အစည်းများ (Faith Based Organization)၊ နိုင်ငံတကာအစိုးရအဖွဲ့အစည်းများ (Inter-Governmental Agencies) အားလုံးနှင့် လက်တွဲဆောင်ရွက်သွားမည်ဟု ထုတ်ပြန်ဖော်ပြထားသည်။
ထုတ်ပြန်ချက်နှင့်ပတ်သက်၍ တိုင်းရင်းသားမိခင်ဘာသာစကားအခြေပြု ဘာသာစကားစုံ ပညာသင်ကြားရေးကို လုပ်ဆောင်နေသော တိုင်းရင်းသားပညာရေးခေါင်းဆောင်တစ်ဦးထံ ဆက်သွယ်မေးမြန်းရာ “ကျနော်တို့ ဒီမိခင်ဘာသာစကားအခြေပြု ဘာသာစကားစုံပညာသင်ကြားရေး နှင့်ပတ်သက်ပြီး NUG ရဲ့ ထုတ်ပြန်ချက်ကို ကြိုဆိုပါတယ်။ ဒါပေမယ့် ဒီ(MTB-MLE) သင်ကြားရေးကို ကြိုးစားလာတာ အခုမှမဟုတ်ဘူး အရင်ကတည်းက ကြိုးစားလာခဲ့ကြတာပါ။ NLD အစိုးရခေတ်တို့ကလည်း ဆွေးနွေးခဲ့တယ် တိုးတက်မှုအနည်းငယ်ပဲ ရှိခဲ့တယ်။ အခုထုတ်ပြန်ချက်အရ ကျနော်တို့ MTB-MLE ကို အားပေးတယ် ပူးပေါင်းဆောင်ရွက်သွား မယ်ဆိုတော့ အံ့ဩမိပါတယ်။
အရင်ဦးသိန်းစိန်သမ္မတတုန်းကလည်း တိုင်းရင်းသားစကားစာပေသင်ကြားရေးကို အဆင့်မြင့်ပညာရေးမှာ သင်ကြားခွင့်ရဖို့ ဆွေးနွေးခဲ့ပေမယ့် ကျနော်တို့ တိုင်းရင်းသားတွေမှာ ကိုယ်ပိုင်သင်ရိုးညွန်းတမ်းအဆင်သင့်မရှိသေးတာကြောင့် အကောင်အထည် ဖော်သွားဖို့ စတင်ကြိုးစားခဲ့ကြတာပါ။ ဒါ့ကြောင့် အခုထုတ်ပြန်ချက်အတိုင်း တိုင်းရင်းသားဘာသာစကားကို စာသင်ခန်းတွင်းမှာ အသုံးပြုခွင့်ရဖို့ဆိုတာ တိုင်းရင်းသားလူမျိုးတိုင်းရဲ့ အိပ်မက်ဖြစ်တယ်။ တစ်ခုပြောချင်တာက ကျနော်တို့ တိုင်းရင်းသားတွေကို အသုံးချတာမဟုတ်ဘဲ အမှန်တကယ် စိတ်ရင်းနဲ့ ပညာရေးကို အားပေးပါလို့ပဲ ပြောချင်တယ်။” ဟု ပြောပြသည်။
လက်ရှိတွင် မိခင်ဘာသာစကားအခြေပြု ဘာသာစကားစုံ သင်ကြားရေးကို တိုင်းရင်းသားဒေသများတွင် စတင်သင်ကြားနိုင်ရေး ဆောင်ရွက်နေသော်လည်း ယခင်အစိုးရရော ယခုစစ်ကောင်စီပါ အတည်ပြုခြင်းတော့ မရှိသေးပါ။
