ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
သျှမ်းပြည်နယ်မြောက်ပိုင်း မူဆယ်မြို့နယ် ၁၀၅ မိုင်နှင့် ပန်ဆိုင်း (ကြူကုတ်) ကြားရှိ နမ့်တောင်းရွာတွင် ဇူလိုင်လ (၁၁) ရက်နေ့ နံနက် (၁၀) ဝန်းကျင်ခန့်တွင် အဆိုပါနေရာ၌ ဆက်ကြေးလာကောက်သော TNLA တပ်သား (၂) ဦး အမည်မသိအဖွဲ့၏ ပစ်ခတ်မှုကြောင့် (၁) ဦး သေဆုံးပြီး (၁) ဦး ပြင်းထန်စွာ ဒဏ်ရာရရှိခဲ့ကြောင်း သိရသည်။
“TNLA စစ်သားတွေ ပစ်ခတ်ခံရပြီးသေဆုံးတာတော့ ဟုတ်တယ်။ မနေ့က နမ့်တောင်းရွာမှာ ပစ်ခံရပြီး အဲ့နေရာမှာပဲ သူတို့အလောင်းတွေ ကျန်နေခဲ့တာ။ စစ်ကောင်စီတပ်သားတွေ လာတဲ့အချိန်နဲ့ သူတို့က အဲ့နေရာမှာ ကားတွေကို စောင့်ပြီး ငွေကောက်နေတဲ့အချိန်တိုက်ပြီး ပစ်ခံရတယ်လို့ပဲထင်တယ်။ အဲ့နားမှာ သူတို့က နေ့တိုင်းလိုလိုလာပြီး ကားတွေကို အခွန်ကောက်နေကျလေနော်။” ဟု မူဆယ်မြို့နယ်အတွင်းရှိ ဒေသခံတစ်ဦးက ပြောပြသည်။
အလားတူ နမ့်တောင်းဒေသခံတစ်ဦးကလည်း “သူတို့က ဒီမှာ အခွန်လာကောက်နေတာ တစ်လကျော်လောက်ရှိနေပြီလေ။ ပြီးတော့ ဒီနားမှာ ကချင်အဖွဲ့တွေလည်းရှိတော့ စစ်ဖြစ်မှာပဲ စိုးရိမ်နေရတာပါ။ အခုလာပစ်သွားတာကတော့ ၁၀၅ မိုင်ကနေ လာတဲ့ ကျောက်တင်တဲ့ကားပေါ်ကနေ ပစ်သွားတာ။ ဘယ်အဖွဲ့ကလည်းဆိုတာတော့ မသိရဘူး” ပြောပြသည်။
ပစ်ခတ်ခံရပြီး သေဆုံးသွားသော TNLA တပ်သားအလောင်းအား ဆိုင်ကယ်ဖြင့် လာရောက်တင်ဆောင်သွားခဲ့ကြောင်း သိရသည်။
ဒါ့အပြင် သျှမ်းပြည်နယ်မြောက်ပိုင်း ကျောက်မဲခရိုင် မိုင်းငေါ့မြို့နယ် နမ့်တွေကျေးရွာအနီးတွင်လည်း ယမန်နေ့ ဇူလိုင်လ (၁၁) ရက်နေ့က TNLA အဖွဲ့နှင့် စစ်ကောင်စီတပ်တို့ (၃) နာရီကြာ ထိတွေ့တိုက်ပွဲဖြစ်ပွားခဲ့ကြောင်း သိရသည်။
