ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
သျှမ်းပြည်နယ်မြောက်ပိုင်း ကျောက်မဲမြို့ (၁)ရပ်ကွက်ရှိ One Love Hotel အရှေ့ ယမန်နေ့ မေလ(၂၆)ရက်နေ့ ည(၈း၂၀)နာရီဝန်းကျင်ခန့်၌ ဗုံးပေါက်ကွဲမှုဖြစ်ပွားပြီး ဟိုတယ်ဝန်ထမ်းတစ်ဦး ဗုံးစထိမှန် ဒဏ်ရာရရှိခဲ့ကြောင်း သိရသည်။
အဆိုပါ ပေါက်ကွဲမှုအနီးတွင် ကျောက်မဲဒေသခံပြည်သူများ အားကိုးအားထားပြုရသည့် ဆေးခန်းတစ်ခုလည်းရှိပြီး ပေါက်ကွဲမှုကြောင့် စိုးရိမ်ထိတ်လန့်ခဲ့ကြသည်ဟုဆိုသည်။ လူ(၁)ဦးအပြင် ဟိုတယ်အတွင်း ရပ်ထားသော ကား(၂)စီးလည်း ထိခိုက်ခဲ့သည်ဟု သိရသည်။
“လက်နက်ကိုင်အဖွဲ့တစ်ဖွဲ့က ဟိုတယ်ပိုင်ရှင်ထံကို ဆက်ကြေးတောင်းတာ မပေးသေးလို့ အခုလို ဗုံးလာခွဲတာလို့တော့ ပြောကြတယ်။ ဘယ်အဖွဲ့လဲဆိုတာကို အသေအချာမသိရသေးပေမယ့် TNLA ဖြစ်တယ်လို့တော့ ဟိုတယ်ဝန်ထမ်းတွေနဲ့ နီးစပ်သူတွေက ပြောပြတယ်။ ဟိုတယ်ပိုင်ရှင်က ကျောက်မဲမှာ အခြားလုပ်ငန်းတွေလည်းရှိသေးတော့ သူတို့ကို ငွေညစ်တောင်းကြတာဖြစ်မယ်။ ဘယ်အဖွဲ့က အခုလိုတောင်းပြီး ဖောက်ခွဲခြိမ်းခြောက်တယ်ဆိုတာကိုတော့ ဟိုတယ်ပိုင်ရှင်နဲ့ဝန်ထမ်းတွေက ကြောက်ကြလို့ မပြောရဲကြပါဘူး။ ကျောက်မဲမှာက TNLA အပြင် SSPP နဲ့ စစ်ကောင်စီအဖွဲ့တွေပဲရှိတယ်။ ကျောက်မဲမှာ ညမထွက်ရ မာရှယ်လော အမိန့်လည်း ရှိနေသေးလို့ လူအရမ်းမထိခိုက်တာပေါ့။” ဟု အဆိုပါဟိုတယ်အနီး နေထိုင်သော ကျောက်မဲဒေသခံတစ်ဦးက ပြောပြသည်။
ကျောက်မဲမြို့တွင် စစ်ကောင်စီအာဏာသိမ်းပြီးနောက် ည ၉ နာရီနောက်ပိုင်း အပြင်မထွက်ရ အမိန့်ထုတ်ပြန်ကြေညာထားသောမြို့တစ်မြို့ဖြစ်သည်။
