ကျောက်ဂူ-သာစည်-အထက်ရဲရွာလမ်း မိုးရွာသွန်းမှုကြောင့် သွားလာရန်ခက်နေ

သျှမ်းပြည်နယ်မြောက်ပိုင်းတွင် တိုက်ပွဲဖြစ်ပွားပြီးနောက်ပိုင်း သျှမ်းပြည်နယ်မြောက်ပိုင်းနှင့်သျှမ်းပြည်နယ်တောင်ပိုင်းကို ဆက်သွယ်သွားလာရာ၌ အဓိကလမ်းဖြစ်သော ကျောက်ဂူ-သာစည်-အထက်ရဲရွာလမ်းသည် မိုးရွာသွန်းမှုကြောင့် ယမန်နေ့ နိုဝင်ဘာလ(၇)ရက်နေ့ကစတင်၍ ဖြတ်သန်းသွားလာရန် ခက်ခဲနေကြောင်း သိရသည်။

မိုးပြန်လည်ရွာသွန်းလာမှုကြောင့် မြေသားလမ်းများတွင် ပွတ်ပြန်အိုင်လာခြင်းဖြစ်ပြီး ကားများ ပွတ်နစ်နေကာ လယ်ထွန်စက်များဖြင့် ဆွဲထုတ်နေရသည်ဟုဆိုသည်။

“ကားငယ်တွေ သာစည်နဲ့ ညောင်ပင်သာရွာကြားထဲမှာ ပိတ်မိနေတာ အများကြီးရှိနေတယ်။ လယ်ထွန်စက်တွေနဲ့ ဆွဲထုတ်လို့ရတဲ့ကားတွေလည်း ဆွဲထုတ်ပေးနေတယ် အချို့ကားကြီးတွေလည်း ပွတ်ထဲနစ်နေလို့ လမ်းတွေလည်း ပိတ်နေတယ်။ မိုးရွာနေတုန်းမို့ ဒီရက်ပိုင်းအတွင်းတော့ ဒီလမ်းကို လာမယ်ဆိုရင် သေချာစုံစမ်းပြီးမှပဲ လာစေချင်တယ်။”ဟု ကျောက်မဲ-တောင်ကြီး ခရီးသည်တင်ယာဉ်မောင်းတစ်ဦးက ပြောသည်။

ကျောက်ဂူ-သာစည်-အထက်ရဲရွာလမ်းပိတ်ဆို့နေမှုကြောင့် တောင်ကြီး-ကျောက်မဲ-သီပေါ ခရီးသွားလာရန် ခက်ခဲစေခြင်းဖြစ်သည်။