သျှမ်းပြည်မြောက်ပိုင်း၊ TNLA ထိန်းချုပ်ထားတဲ့ နမ့်ဆန်မြို့နယ်ကို စစ်တပ်က လေကြောင်းနဲ့ ဗုံးကြဲတိုက်ခိုက်တာကြောင့် ကလေး ၂ ဦး သေဆုံးပြီး ၉ ဦး ထိခိုက်ဒဏ်ရာရတယ်လို့ TNLA က ထုတ်ပြန်ထားပါတယ်။
ယနေ့အောက်တိုဘာလ ၄ ရက် နေ့လည် ၁၂ နာရီခွဲဝန်းကျင်အချိန်တွင် စစ်တပ် က ဂျက်ဖိုက်တာနဲ့ ပေါင် ၂၅၀ ဗုံး ၂ လုံးကြဲချတိုက်ခိုက်တာကြောင့် နမ့်ဆန်မြို့နယ်၊ ဇယ်တုန်ဟုန်းကျေးရွာမှာ ကျရောက် ပေါက်ကွဲပြီး အသက် ၁၃ နှစ်အောက် ကလေး ၂ ဦး သေဆုံးပြီး ကလေး ၆ ဦးအပါအဝင် ၉ ဦး ထိခိုက်ဒဏ်ရာရရှိကြောင်း ထုတ်ပြန်ချက်မှာ ဖော်ပြထားပါတယ်။
ဗုံးကြဲမှုကြောင့် လူထိခိုက်သေဆုံးမှုရှိသလို နေအိမ် ၁၆ အိမ်လည်း ထိမှန်ပျက်စီးခဲ့တယ်လို့ သိရပါတယ်။
အလားတူ ယနေ့ နံနက်ပိုင်းအချိန်က သီပေါမြို့နယ်ရှိ မန်ဟဲကျေးရွာနဲ့ အုံမုကျေးရွာတို့ကို စစ်တပ်က ဗုံးလာရောက်ကြဲချတိုက်ခိုက်တယ်လို့ သိရပါတယ်။
ပြီးခဲ့တဲ့ အောက်တိုဘာလ ၂ ရက်နေ့ကလည်း သီပေါမြို့နယ်နဲ့ နမ္မတူမြို့နယ်ထဲ ပေါင် ၅၀၀ ဗုံးကြဲချတိုက် ခိုက်တာကြောင့် နေအိမ်၊ အဆောက်အဦး ထိခိုက်ပျက်စီးသလို ပြည်သူ ၃ ဦး သေဆုံးပြီး ၆ ဦးထိခိုက် ဒဏ်ရာရရှိခဲ့ပါတယ်။
စစ်တပ်က နောင်ချိုမြို့နဲ့ ကျောက်မဲမြို့ကို ပြန်လည်သိမ်းပိုက်ပြီးတဲ့နောက် TNLA ထိန်းချုပ်ထားတဲ့ သီပေါ၊ နမ္မတူ၊ မန်တုံနဲ့ ဌာနချုပ်တည်ရှိရာ နမ့်ဆန်မြို့နယ်ကိုပါ လေကြောင်းတိုက်ခိုက်မှုတွေ ဆက်လက် လုပ်ဆောင်လာတာပဲဖြစ်ပါတယ်။