သျှမ်းပြည်နယ်မြောက်ပိုင်းအတွင်း TNLA အဖွဲ့နှင့်ပူးပေါင်းတော်လှန်ရေးအဖွဲ့များ သိမ်းပိုက်ထားသော မြို့နယ်များ၌ နေထိုင်ကြသူများ၏ အိမ်ထောင်စုစာရင်းအား တအာင်းဘာသာဖြင့် ပြန်လည်ပြုပြင်သွားမည်ဖြစ်ကြောင်း TNLA အဖွဲ့က ဒေသခံပြည်သူများအား အကြောင်းကြားထားသည်ဟု ဆိုသည်။
“မနေ့ကတုန်းက မိုင်းငေါ့မှာကျန်ခဲ့တဲ့အမေနဲ့အစ်မက ကျမကို ပြောပြလာတာကတော့ ကျမတို့ကိုင်ထားတဲ့ အိမ်ထောင်စုစာရင်းကို ပြန်ပြင်ချင်တာ လူဦးရေထပ်တိုးချင်တာတို့ရှိရင် TNLA အဖွဲ့ရဲ့ လဝက ကိုသွားပြောရမယ်ပေါ့။ ပြီးတော့ အခုအိမ်ထောင်စုဇယားကိုလည်း ကော်ပီကူးထားပြီးတော့ လာမည့်နှစ်မှာ တအာင်းဘာသာနဲ့ ပြန်ထုတ်ပေးမယ်လို့ပြောတယ်။ ကျမတို့ မိုင်းငေါ့မြို့မှာဆိုရင် တအာင်းပလောင်လူမျိုးတွေအပြင် သျှမ်းလူမျိုးနဲ့ အခြားတိုင်းရင်းသားတွေလည်းအများကြီးရှိတော့ သူတို့ဘယ်လိုလုပ်ပေးမလဲ မသိရသေးဘူး။ ပြီးတော့ တအာင်းပလောင်စာလည်း ကျမတို့မဖတ်တတ်ဘူး။” ဟု တောင်ကြီးမြို့သို့ ရောက်ရှိနေသော မိုင်းငေါ့မြို့ဒေသခံတစ်ဦးက ပြောပြသည်။
စစ်ဆင်ရေး ၁၀၂၇ ကာလအတွင်း TNLA နှင့် တော်လှန်ရေးအင်အားစုများက နမ္မတူ၊ နမ့်ဆန်၊ နမ့်ခမ်း၊ ကွတ်ခိုင်၊ မိုင်းတုံ၊ မိုင်းငေါ့၊ မန်တုံ၊ နောင်ချို၊ ကျောက်မဲ၊ မိုးကုတ်၊ မိုးမိတ်နှင့် သီပေါမြို့တို့အား သိမ်းပိုက်ရရှိထားသည်။ အဆိုပါမြို့များအတွင်း တိုင်းရင်းသားလူမျိုးစုများစွာ စုပေါင်းနေထိုင်ကြခြင်းဖြစ်ပြီး အများစုမှာ တအာင်းစာပေအား တတ်မြောက်ခြင်းမရှိပါ။