ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
သျှမ်းပြည်နယ်မြောက်ပိုင်း၊ မူဆယ်မြို့နယ်စယ်လန့်ကျေးရွာတွင် ယမန်နေ့ညက စစ်ကောင်စီတပ်နှင့် TNLA တို့အပြန်အလှည် ပစ်ခတ်မှုကြောင့် ရွာအတွင်းရှိ ဘုန်းကြီးကျောင်း လက်နက်ကြီးကျည်ထိမှန်ပြီး ပျက်စီးခဲ့သလို ကျေးရွာအတွင်းရှိ လူနေအိမ် (၂) လုံးလည်း လက်နက်ကြီးကျည်ထိမှန်ပြီး မီးလောင်ကျွမ်းပျက်စီးခဲ့ကြောင်း သိရရှိရသည်။
စယ်လန့်တောင်ပိုင်း ဘုန်းကြီးကျောင်းဝင်းအတွင်း လက်နက်ကြီးလက်နက်ငယ် ကျည်ရာများစွာတွေ့ရမည်ဖြစ်ပြီး မပေါက်ကွဲသေးသော လက်နက်ကြီးကျည် တစ်လုံးလည်း ကျောင်းဝင်းထဲတွင် စိုက်နေသည်ကိုလည်း တွေ့ရသည်။
“ မနေ့မနက်ပိုင်းကနေ ညပိုင်းအထိ စယ်လန့်မှာ တိုက်ပွဲတွေပြင်းပြင်းထန်ထန်ကိုဖြစ်ခဲ့တာပေါ့။ ရွာတောင်ပိုင်းဘုန်းကြီးကျောင်းဝင်းအထိ TNLA တွေရောက်လာပြီး ကျောင်းဝင်းကို အကာအကွယ်ယူတော့ စစ်ကောင်စီတွေက လက်နက်ကြီးတွေနဲ့ပစ်လို့ ဘုန်းကြီးကျောင်းလည်း တော်တော်ပျက်စီးသွားတယ်။ ညက ရွာထဲကို လက်နက်ကြီးကျည်ထိပြီး လူနေအိမ်တွေပေါ်ကျလို့ အိမ် ၂ အိမ်မီးလောင်ပျက်စီးသွားတယ်။ မနေ့ညကတော့ တစ်ညလုံး အပြန်အလှန်ပစ်ခတ်နေကြတာ မူဆယ်ထိတောင် လက်နက်ကြီးသံတွေကြားနေရတာပါ။” ဟု စယ်လန့်ဒေသခံတစ်ဦးက ပြောပြသည်။
ယနေ့နံနက်ပိုင်းတွင် တိုက်ပွဲသံ ငြိမ်သက်နေသော်လည်း ၂ ဖက်တပ်များ စစ်ရေးတင်းမာနေဆဲဖြစ်သည်။
လက်ရှိတွင် ဟိုနားဘုန်းကြီးကျောင်း၌ ပန်ဆတ်ရွာနှင့် နမ့်ကတ်ရွာမှ လာရောက်ခိုလှုံသည့် စစ်ဘေးရှောင်မိဘပြည်သူ (၁၈၉) ဦး ရောက်ရှိတိမ်းရှောင်နေသည်ဟု သတင်းရရှိသည်။
