ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
ယမန်နေ့ ဇွန်လ (၅) ရက်နေ့ နံနက် (၉) နာရီတွင် သျှမ်းပြည်နယ်မြောက်ပိုင်း မူဆယ်မြို့နယ် ပန်ခမ်းကျေးရွာအုပ်စု ပန်ခမ်းရွာတွင် SSPP အဖွဲ့မှ တပ်သားသစ်စုဆောင်းရေးအတွက် ဒေသခံ ကျေးရွာလူထုနှင့် လာရောက်တွေ့ဆုံခဲ့ကြောင်း သိရသည်။
တွေ့ဆုံမှု၌ ကျေးရွာတစ်ရွာအတွင်း (၁၀) အိမ်လျှင် ယောက်ျားသား (၂) ဦးနှုန်း အိမ်ခြေ (၁၀၀) ရှိပါက (၂၀) ဦး SSPP အဖွဲ့၌ တပ်သားသစ်အဖြစ် တာဝန်ယူထမ်းဆောင်ရမည်ဖြစ်ကြောင်း SSPP တာဝန်ခံတစ်ဦးမှ ပြောကြောင်း ဒေသခံတစ်ဦးက ပြောပြသည်။
“သူတို့လာတာက အင်အားအများကြီးပဲ။ လက်နက်တွေအပြည့်အစုံနဲ့ ရွာရဲ့ ဇရပ်မှ လာရောက်တွေ့ဆုံကြတာပါ။ အိမ်ထောင်စု (၁၀) စုမှ (၂) ဦး စစ်သားလုပ်ရမယ်တဲ့ တစ်ဦးက တစ်သက်စာလုံး စစ်သားလုပ်ရမယ် ကျန်တစ်ဦးက ကျေးရွာစစ်သားပုံစံလုပ်ရမယ်ဆိုပြီးပြောပါတယ်။ သူတို့ဘက်ကပဲ တစ်ဖက်သတ်ဖိအားပေးပြီး ရွာခံတွေကို ပြောသွားတော့ ရွာသူရွာသားတွေက မကျေနပ်ကြဘူး။ သဘောတူမှုလည်းမရကြဘဲနဲ့ သူတို့ပြန်ခါနီး ရွာသားတွေက ဝိုင်းပြောကြတော့ အပြင်မှာ စောင့်နေတဲ့ သူတို့စစ်သားတွေက သေနတ် (၁၀) ချက်ကျော်ကျော်လောက်ဖောက်ပြီး ခြိမ်းခြောက်လိုက်တယ်။ ပြီးတော့ အခုတပ်သားသစ်စာရင်းကို ဇွန်လ (၁၀) ရက်နေ့ နောက်ဆုံးထားပြီး ပေးပို့ရမယ်။ ပြီးရင် အခုကိစ္စနဲ့ပတ်သက်ပြီးတော့ ဆူပူအုံကြွမှုတွေ၊ ဆန္ဒပြတာတွေမလုပ်ဖို့လည်း သတိပေးခြိမ်းခြောက်သွားသေးတယ်။ အဲ့လို ဆန္ဒပြတဲ့အိမ်တွေရှိရင် သူတို့လာဖမ်းမယ်ဆိုပြီး ပြောသွားသေးတယ်။” ဟု အမည်မဖော်လိုသူ ဒေသခံတစ်ဦးက ပြောပြသည်။
ယနေ့တွင်လည်း SSPP အဖွဲ့မှ မူဆယ်မြို့နယ် တိန်းလုံရွာနှင့် တုံဟုန်းချိုရွာ မှ ဒေသခံများထံ တပ်သားသစ်စုဆောင်းရန် တွေ့ဆုံဆွေးနွေးသွားမည်ဟု သိရသည်။
