RCSS/SSA ဌာနချုပ် လွယ်တိုင်းလျန်းတွင် သျှမ်းနှစ်သစ်ကူးအထိမ်းအမှတ်အခမ်းအနားအား အကျဉ်းချုံးသာ ကျင်းပပြုလုပ်

ယနေ့ (၁၃.၁၂.၂၀၂၃) ရက်နေ့တွင် ကျရောက်သော သျှမ်းသက္ကရာဇ် (၂၁၁၈) ခု သျှမ်းနှစ်သစ်ကူး အထိမ်းအမှတ်အခမ်းအနားအား သျှမ်းပြည်နယ်မြောက်ပိုင်းတွင် စစ်ဘေးစစ်ဒဏ်များ ခံစားနေရသော မိဘပြည်သူများအား စာနာထောက်ထားခြင်းအားဖြင့် သျှမ်းပြည်ပြန်လည်ထူထောင်ရေးကောင်စီ/သျှမ်းပြည်တပ်မတော် (RCSS/SSA) ဌာနချုပ် လွယ်တိုင်းလျန်း၌ အကျဉ်းချုံးသာကျင်းပပြုလုပ်သည်။

အခမ်းအနား သျှမ်းတိုင်းရင်းသားတစ်ဦးဖြစ်သူ စိုင်းနော်ခေးက “နှစ်ဟောင်းကုန်လို့ နှစ်သစ်ကူးရောက်လာပြီဖြစ်တဲ့အတွက် အဆိုးတွေကုန်ပြီးအကောင်းဆုံးတွေ ရောက်လာပါစေလို့ ဆုတောင်းပေးပါတယ်။ ပြောင်းလဲလာသည့် သျှမ်းပြည်နယ်အခြေအနေအရပ်ရပ်အပေါင်းအပေါ်မှာ မူတည်ပြီး ပြည်သူလူထုများအားလုံး ဘေးရန်ကင်းဝေးတဲ့ လိုက်လျောညီထွေနေထိုင်နိုင်ရန် ပူးပေါင်းဆောင်ရွက်နိုင်ကြပါစေ။ သျှမ်းပြည်နယ်မြောက်ပိုင်းမှာ စစ်ဘေးစစ်ဒဏ်ခံစားနေရသော မိဘပြည်သူများအားလုံးလည်း အကောင်းမွန်ဆုံးသော အခြေအနေတစ်ခု အမြန်ဆုံးရရှိခံစားပါစေ” ဟူ၍ ဆုတောင်းစကားပြောကြားခဲ့သည်။

အဲ့ဒီနောက် RCSS/SSA ဥက္ကဌ ဗိုလ်ချုပ်ကြီးယွက်စစ်က “ယခုနှစ်မှာကျရောက်သော သျှမ်းနှစ်သစ်ကူးနေ့သည် သျှမ်းပြည်နယ်ရှိ ပြည်သူများခံစားနေရသော ဒုက္ခအပေါင်းတို့အရ အလွန်ဝမ်းနည်းစရာကောင်းလှပါတယ်။ မိမိတို့၏ ယဉ်ကျေးမှု ထုံးတမ်းအစဉ်အလာများ ပျောက်ပျက်မသွားဖို့ တစ်မျိုးသားလုံး ဝိုင်းဝန်းထိန်းသိမ်းဖို့ လိုအပ်တယ်။” ဟူ၍ အမှာစကားတွင် ထည့်သွင်းပြောကြားခဲ့သည်။

ထို့နောက် တက်ရောက်လာသူများအားလုံးက နှစ်သစ်ကူးအလှူဒါနပြုလုပ်ပြီး အခမ်းအနားကို အောင်မြင်စွာရုတ်သိမ်းခဲ့ကြောင်း သတင်းရရှိသည်။

sources & တႆးလွတ်ႈလႅဝ်း