ကရင်ပြည်နယအတွင်း စစ်ရေးလှုပ်ရှားမှုများဆောင်ရွက်သည့် National Special Force ပြည်သူ့ကာကွယ်ရေးအဖွဲ့သည် ၎င်းတို့အဖွဲ့၏ အဖွဲ့ခေါင်းဆောင် (၃) ဦးက စစ်ကောင်စီတပ်နှင့် ပူးပေါင်းသွားသည့်အပြင် အဖွဲ့ဝင်တပ်သားများ၏ မိသားစုလုံခြုံရေးပါ ခြိမ်းခြောက်မှုပြုလုပ်လာသည့် အတွက် စက်တင်ဘာလ (၁) ရက်နေ့ကစပြီး National Special Force အဖွဲ့အား ဖျက်သိမ်းကြောင်း RFA သတင်းဌာနက စက်တင်ဘာလ (၁၂)ရက်နေ့က ဖော်ပြခဲ့သည်။
National Special Force အဖွဲ့၏ ဒုတပ်ခွဲမှူး ရန်ကုန် (ခေါ်) ဘုန်းမြင့်အောင်၊ တပ်ခွဲမှူး အန်ဒရူး (ခေါ်) ချစ်ဇင်လင်း တို့ (၂) ဦးသည် ၂၀၂၃ ခုနှစ် ဇူလိုင်လပိုင်းက အဖွဲ့အတွက်အလှူခံထားသော မြန်မာငွေကျပ်သိန်း (၉၀၀) ခန့်တန်ဖိုးရှိသည့် ထိုင်းဘတ်ငွေ (၁၀) သိန်းခန့်အား ယူဆောင်ကာ စစ်ကောင်စီနှင့်ပူးပေါင်းခဲ့ကြောင်း သိရသည်။ စက်တင်ဘာလ (၈) ရက်နေ့ကလည်း တပ်စုမှူး ထိပ်ပေါက် (ခေါ်) မင်းသူရိန် က သေနတ်တစ်လက် လက်ပစ်ဗုံးတစ်လုံး ကျည် (၂၅၀) ခန့်နှင့်ဆက်စပ်ပစ္စည်းများယူဆောင်ပြီး စစ်ကောင်စီနှင့် ထပ်မံပူးပေါင်းခဲ့သည်ဟု ဆိုသည်။
စစ်ကောင်စီနှင့်ပူးပေါင်းသွားသူများသည် ကျန်ရှိနေသေးသော PDF ရဲဘော်များအား ၎င်းတို့နည်းတူ စစ်ကောင်စီနှင့်လာရောက်ပူးပေါင်းရန်နှင့် ပူးပေါင်းခြင်းမပြုပါက ၎င်းတို့၏ မိသားစုဝင်များအား အန္တရာယ်ပြုမည်ဟု ခြိမ်းခြောက်နေကြောင်း သိရသည်။ ထို့ကြောင့် ကျန်ရှိနေသော ခေါင်းဆောင်များက ၎င်းတို့အဖွဲ့အား ဖျက်သိမ်းပြီး တောင်ပိုင်းတိုင်းစစ်ဌာနချုပ်လက်အောက်က တပ်ရင်းတစ်ဖွဲ့ထံ ဝင်ရောက်ခိုလှုံလျက်ရှိသည်ဟု ဆိုသည်။
ဒါ့အပြင် စစ်ကိုင်းတိုင်းဒေသကြီး ပုလဲနယ်အတွင်းရှိသည့် မြန်မာ့တော်ဝင်နဂါးတပ် (MRDA) မှ ဗိုလ်နဂါးဦးဆောင်ပြီး NUG လက်အောက်ခံမဟုတ်သော ဒေသခံပြည်သူ့ကာကွယ်ရေးအဖွဲ့များ (LPDF) နှင့် ပူးပေါင်းကာ ဗမာအမျိုးသားတော်လှန်ရေးတပ် BNRA ကို စတင်ဖွဲ့စည်းကြောင်း စက်တင်ဘာလအစောပိုင်းက ထုတ်ပြန်ခဲ့သည်။
တစ်ဖက်တွင်လည်း NUG ဘက်မှ ဗိုလ်နဂါးသည် BNRA ဖွဲ့စည်းတည်ထောင်ရန် ၎င်းတို့အား ဆွေးနွေးတိုင်ပင်ခြင်းမရှိကြောင်း ထုတ်ပြန်ခဲ့သည်။