ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
သျှမ်းပြည်နယ်မြောက်ပိုင်း လားရှိုးမြို့အား MNDAA နှင့် တော်လှန်ရေးအင်အားစုများက အလုံးစုံသိမ်းပိုက်ပြီးနောက် ယနေ့ ဩဂုတ်လ(၅) ရက်နေ့ နံနက်ပိုင်းတွင် မြို့တွင်းကျန်ရှိနေသော ပရဟိတအဖွဲ့ဝင်များနှင့် ဒေသခံပြည်သူများက စုပေါင်းသန့်ရှင်းရေး ပြုလုပ်ခဲ့သည်။
လားရှိုးမြို့ရှိ အရှေ့မြောက်ပိုင်းတိုင်း စစ်ဌာနချုပ်အား MNDAA က သိမ်းပိုက်ပြီးနောက် လက်နက်ကြီးဖြင့် ပစ်ခတ်တိုက်ခိုက်မှု မရှိတော့ဘဲ ပြန်လည်တည်ငြိမ်စပြုလာပြီဟုလည်း ဒေသခံတစ်ဦးကပြောပြသည်။
“ မနက်ကတော့ ရပ်ကွက်(၉)ဘက်က ဘူတာဈေးဖွင့်ပြီးတော့ ဈေးသည်တွေ ဈေးပြန်ရောင်းကြတယ်။ လားရှိုးမှာပိတ်မိနေတဲ့သူတွေလည်း ဈေးထွက်ဝယ်ကြတော့ တစ်ယောက်နဲ့တစ်ယောက်နူတ်ဆက်အားပေးကြ စကားပြောကြနဲ့ နွေးထွေးသလိုခံစားရပါတယ်။ အခုတော့ တိုက်ပွဲသံမကြားရတော့ဘူးပေါ့။ လေယာဉ်နဲ့ဗုံးလာကြဲမှာပဲ ကြောက်ရတယ်။ ကျမက သူများတွေလို ထွက်ပြေးချင်ပေမယ့် အမေကအသက်အရမ်းကြီးနေတော့ အမေနဲ့အတူတူ မြို့ထဲမှာပဲ ဆက်နေကြရတာပေါ့။ ဘုရားကိုပဲ အာရုံပြုပြီး အိမ်ထဲမှာပုန်းနေခဲ့ရတာပါရှင့်။” ဟု လားရှိုးမြို့တွင်း ကျန်ခဲ့သော အမျိုးသမီးတစ်ဦးက ပြောပြသည်။
လားရှိုးမြို့၌ MNDAA အဖွဲ့ထံ လက်နက်ချအညံ့ခံသော စစ်ကောင်စီတပ်သား (၄၀၀၀) ဦးကျော်ပြီဟု သိရပြီး အချို့လည်း ထွက်ပြေးနေသေးကြောင်း ဒေသသတင်းအရင်းအမြစ်များ၏ ဖော်ပြချက်အရ သိရသည်။
