အမေရိကန်နဲ့အစ္စရေးတို့ရဲ့ ပူးပေါင်းတိုက်ခိုက်မှုများအတွင်း အီရန် ၏ အမြင့်ဆုံး ခေါင်းဆောင်ကြီး ဖြစ်သည့် အယာတိုလာ အလီ ခါမေနီ (Ayatollah Ali Khamenei)နှင့် အီရန်သမ္မတ မာဆွတ် ပီဇက်ရှ်ကီယန် (Masoud Pezeshkian) တို့ နှစ်ဦးစလုံးမှာ ပစ်မှတ်ထားခံခဲ့ရကြောင်း အစ္စရေး အရာရှိတစ်ဦးက ပြောကြားခဲ့သည်။
တိုက်ခိုက်မှုများ၏ ရလဒ်ကိုမူ ရှင်းရှင်းလင်းလင်း မသိရသေးကြောင်း အဆိုပါအရာရှိက ဆိုသည်။
ယခုကိစ္စနှင့် ပတ်သက်၍ သတင်းရင်းမြစ်တစ်ခုက ခါမေနီသည် တီဟီရန်မြို့တွင် ရှိမနေဘဲ လုံခြုံ စိတ်ချရသော နေရာတစ်ခုသို့ ပြောင်းရွှေ့ထားပြီးဖြစ်ကြောင်း ရိုက်တာသတင်းဌာနသို့ အစောပိုင်းက ပြောကြားခဲ့သည်။
အီရန်အာဏာပိုင်အဖွဲ့အစည်းနှင့် နီးစပ်သည့် သတင်းရင်းမြစ်တစ်ခု၏ အဆိုအရ တိုက်ခိုက်မှုများ အတွင်း တော်လှန်ရေးအစောင့်တပ်ဖွဲ့ (Revolutionary Guard) မှ အဆင့်မြင့်တပ်မှူးအချို့နှင့် နိုင်ငံရေး အရာရှိများ သေဆုံးခဲ့ကြောင်း သိရသည်။
အီရန်နိုင်ငံခြားရေးဝန်ကြီး အဘတ်စ် အရတ်ချီ (Abbas Araqchi) မှာမူ ဘေးကင်းလုံခြုံစွာ ရှိနေကြောင်း အီရန်မီဒီယာများက ဖော်ပြထားကြောင်း သိရပါသည်။
Ref; Reuters