အရက်နဲ့ ယစ်မျိုးသက်ဝင်ပစ္စည်းကို အများပြည်သူသုံးစွဲမှု စနစ်ကျနမှုရှိစေဖို့၊ အရက်သောက်သုံးမှု အလေ့အထ လျော့နည်းစေဖို့နဲ့ အရက်သောက်သုံးမှု လျှော့ချနိုင်စေဖို့ဆိုပြီး အမျိုးသားကာကွယ်ရေးနှင့် လုံခြုံရေးကောင်စီ (ကာ/လုံ) က မတ်လ ၇ ရက်နေ့က ယစ်မျိုးဥပဒေအသစ် ပြဋ္ဌာန်း လိုက်ပါတယ်။
အရက်ကို ထုတ်လုပ်တာ၊ သိုလှောင်တာ၊ သယ်ယူပို့ဆောင်တာ၊ ဖြန့်ဖြူးရောင်းချတာ၊ ပြည်ပမှတင်သွင်း တာနဲ့ ပြည်ပသို့ တင်ပို့တာတွေကို စနစ်တကျဆောင်ရွက်နိုင်ဖို့နဲ့ နိုင်ငံတော်အတွက် ရသင့်ရထိုက်တဲ့ ယစ်မျိုးခွန်တွေ အပြည့် အဝရရှိစေရေး ကြီးကြပ်နိုင်ဖို့ဆိုတဲ့ ရည်ရွယ်ချက်နဲ့ ပြဋ္ဌာန်းတာ ဖြစ်တယ်လို့ ဆိုပါတယ်။
အသစ်ပြဋ္ဌာန်းလိုက်တဲ့ အဲ့ဒီ ယစ်မျိုးဥပဒေမှာ အခန်း ၁၈ နဲ့ ပုဒ်မ ပေါင်း ၈၀ ကျော်ပါဝင်တာဖြစ်ပါတယ်။
ဒီဥပဒေကို နိုင်ငံတော်သမ္မတက အမိန့်ကြော်ငြာစာ ထုတ်ပြန်ပြီး သတ်မှတ်တဲ့ နေ့ရက်မှ စတင် အာဏာတည်စေရမယ်လို့ ဆိုပါတယ်။
ယစ်မျိုးနဲ့ သက်ဆိုင်တဲ့ ထုတ်လုပ်တာ၊ တန်းဖိုးမြင့်ထုတ်ကုန်အဖြစ် ထုတ်လုပ်တာ၊ ပုလင်းသွတ်တာ၊ ဖြန့်ဖြူး ရောင်းချတာတွေအတွက် ယစ်မျိုးလိုင်စင် လျှောက်ထားရမှာဖြစ်တယ်လို့လည်း ဥပဒေမှာ ပြဋ္ဌာန်းထားပါတယ်။
ယစ်မျိုးလိုင်စင်ကိုတော့ မြန်မာနိုင်ငံသားဥပဒေပါ နိုင်ငံသား၊ ဧည့်နိုင်ငံသား ဒါမှမဟုတ် နိုင်ငံသား ပြုခွင့် ရသူ၊ မြန်မာနိုင်ငံကုမ္ဗဏီများ ဥပဒေနဲ့ မှတ်ပုံတင်ထားတဲ့ မြန်မာနိုင်ငံသားပိုင် ကုမ္ဗဏီ ဒါမှမဟုတ် နိုင်ငံခြားသား အစုရှယ်ယာ ၄၉ ရာခိုင်နှုန်းအောက် ပါဝင်တဲ့ နိုင်ငံခြားကုမ္ဗဏီ၊ မြန်မာနိုင်ငံသား တစ်ဦး တည်းပိုင် ကုမ္ဗဏီ၊ မြန်မာနိုင်ငံသားတွေနဲ့ ဖွဲ့စည်းထားတဲ့ စီးပွားရေးလုပ်ငန်းဆိုင်ရာ အဖွဲ့အစည်း ဒါမှ မဟုတ် အစုစပ်လုပ်ငန်း အဖွဲ့အစည်းတွေ လျှောက်ထားနိုင်တယ်လို့ ဥပဒေပုဒ်မ ၁၂ မှာ ပြဋ္ဌာန်းထား ပါတယ်။