ဖေဖော်ဝါရီလ ၂၈ ရက် ဒေသစံတော်ချိန် နံနက်ပိုင်းမှာ အမေရိကန်နဲ့ အစ္စရေးတို့က အီရန်စစ်တပ်နှင့် အစိုးရ ပစ်မှတ်များကို စတင်တိုက်ခိုက်ခဲ့ပြီးနောက် အီရန်ဘက်မှလည်း ပင်လယ်ကွေ့ဒေသရှိ နိုင်ငံ အချို့မှ အမေရိကန်စစ်အခြေစိုက်စခန်းများကို ပစ်မှတ်ထားတိုက်ခိုက်ခဲ့သလို အစ္စရေးနိုင်ငံဘက်သို့ လည်း ဒုံးကျည်များစွာဖြင့် လက်တုံ့ပြန်ပစ်ခတ်ခဲ့တယ်လို့ အီရန်ဘက်က ပြောကြားခဲ့ပါတယ်။
ဒေသတွင်းရှိ နိုင်ငံအချို့မှာ ဒုံးကျည်ကာကွယ်ရေးစနစ်များ အသုံးပြုကာ ကြားဖြတ်ဟန့်တားမှုများ လုပ်ဆောင်နေစဉ် ပေါက်ကွဲသံများ ပျံ့နှံ့ထွက်ပေါ်ခဲ့ပါတယ်။ အီရန်တော်လှန်ရေးအစောင့်တပ် (IRGC) နဲ့ နီးစပ်တဲ့ Nour News သတင်းဌာန၏ အဆိုအရ အီရန်သည် အစ္စရေးနိုင်ငံဘက်သို့ ပစ်မှတ်ထားကာ ပဲ့ထိန်းဒုံးကျည် (ballistic missiles) “ အစင်းပေါင်းများစွာ” ပစ်ခတ်ခဲ့ကြောင်း သိရသော်လည်း ထိခိုက်သေဆုံးမှု သတင်းများမူ မသိရှိရသေးပါဘူး။
IRGC ရဲ့ ထုတ်ပြန်ချက်မှာ ကာတာနိုင်ငံရှိ အမေရိကန်ရဲ့ ဒေသတွင်း အကြီးဆုံးလေတပ်စခန်းဖြစ်တဲ့ Al-Udeid လေတပ်စခန်း၊ ကူဝိတ်နိုင်ငံရှိ Al-Salem လေတပ်စခန်း၊ ယူအေအီး (UAE) ရှိ အဘူဒါဘီမြို့အနီးက Al-Dhafra လေတပ်စခန်းနှင့် ဘာရိန်းနိုင်ငံရှိ အမေရိကန်ရေတပ်ရဲ့ (5th Fleet) ဌာနချုပ် အခြေစိုက်စခန်းတို့ကို ပစ်မှတ်ထားတိုက်ခိုက်ခဲ့တယ်လို့ ဖော်ပြထားပါတယ်။
ဒါ့အပြင် ဂျော်ဒန်နိုင်ငံရှိ Muwaffaq Al-Salti လေတပ်စခန်းနှင့် အီရတ်မြောက်ပိုင်း (Kurdistan ဒေသ) ရှိ အမေရိကန်အခြေစိုက်စခန်းတစ်ခု တို့လည်း တိုက်ခိုက်ခံခဲ့ရကြောင်း အီရန်နိုင်ငံပိုင် မီဒီယာများက ဖော်ပြထားပါတယ်။
ယူအေအီးနိုင်ငံသို့ ပစ်ခတ်ခဲ့တဲ့ ဒုံးကျည်အချို့ကို ကြားဖြတ်ဟန့်တားနိုင်ခဲ့သော်လည်း ဒုံးကျည် အပျက်အစီးများက လူနေရပ်ကွက်အတွင်းသို့ ကျရောက်ခဲ့တာကြောင့် အရပ်သားတစ်ဦး သေဆုံးခဲ့ကြောင်း ယူအေအီးအစိုးရသတင်းဌာနက ဆိုပါတယ်။
Ref: CNN