၂၀၂၀ ခုနှစ်ကတည်းက ကိုဗစ်-၁၉ ကပ်ရောဂါကြောင့် သျှမ်းပြည်နယ်တောင်ပိုင်း၏ အထင်ကရပွဲတော်တစ်ခုဖြစ်သည့် အင်းလေးဖောင်တော်ဦးရုပ်ရှင်တော်မြတ်များ ဒေသစာရီကြွချီအပူဇော်ခံခြင်းကို ရပ်နားခဲ့ရသည်။
ယခုနှစ် ၂၀၂၃ ခုနှစ်တွင် အင်းလေးဖောင်တော်ဦးရုပ်ရှင်တော်မြတ်ဒေသစာရီအပူဇော်ခံခြင်းကို ပြန်လည်ကျင်းပပြုလုပ်မည်ဖြစ်ကြောင်း ညောင်ရွှေမြို့နယ် သံဃာ့နာယကအဖွဲ့ဆရာတော်များ နှင့် ဘုရားဂေါပကများက ယနေ့ပြုလုပ်သော အစည်းအဝေးတွင် ဆုံးဖြတ်ခဲ့ကြောင်း သတင်းရရှိသည်။
ယနေ့ (၉.၈.၂၀၂၃)ရက်နေ့၌ သျှမ်းပြည်နယ်တောင်ပိုင်း ညောင်ရွှေမြို့တွင် သံဃာ့နာယကများ၊ ဖော်တော်ဦးမြတ်စွာဘုရား ရုပ်ရှင်တော်မြတ်ကြီး၏ ဆရာတော်များ နှင့် ဖောင်တော်ဦးဘုရား ဂေါပကများက အစည်းအဝေးပြုလုပ်ခဲ့ပြီး အဆိုပါဆုံးဖြတ်ချက်ကို ဆုံးဖြတ်ခဲ့ခြင်းဖြစ်သည်။
အင်းလေးဖောင်တော်ဦးဘုရား ဒေသစာရီကြွချီအပူဇော်ခံခြင်းကို (၁၅.၁၀.၂၀၂၃)ရက်နေ့မှ (၁.၁၁.၂၀၂၃)ရက်နေ့အထိ ရှေးရိုးရာအစဉ်အလာအတိုင်း အင်းလေးဒေသ(၂၁)ဌာနသို့ ကြွရောက်မည်ဖြစ်ကြောင်း သတင်းရရှိသည်။
