သျှမ်းပြည်နယ်တောင်ပိုင်း အင်းလေးဒေသတွင် စစ်ရှောင်များကို ကူညီကယ်ဆယ်ထားသည့် ပရဟိတ ဆရာတော်တစ်ပါးကို စစ်ကောင်စီတပ်က ဒီဇင်ဘာလ ၂၈ ရက်နေ့ မနက်ပိုင်းတွင် ဝင်ရောက်ဖမ်း ဆီးသွားကြောင်း အင်းလေးဒေသ သတင်းရင်းထံမှ သိရသည်။
“ ဖမ်းခံလိုက်ရတာက အင်းတိမ်ညောင်အုပ် ဆရာတော်ပေါ့ ၊ အရင်လက ခရိုင်ထွေအုပ် ညွှန်ကြားချက်ဆိုပြီး ညောင်ရွှေထွေအုပ်က စာထွက်ထားတယ် စစ်ရှောင်တွေအကုန်နေရပ်ပြန်ရမယ် လက်ခံထားလို့မရတော့ဘူးဆိုပြီး ဆရာတော်က ငါကတော့ ပြန်မလွတ်နိုင်ဘူး စစ်တပ်မီးရှို့လို့ နေစရာမရှိတဲ့ သူတွေ ငါလက်ခံမယ် ကျွေးမယ် ငါလက်ခံလို့ ငါ့ကို ဖမ်းချင်ဖမ်းဆိုပြီးမိန့်တယ် ၊ အခုတော့ PDF နဲ့ဆက်သွယ်တယ်ဆိုပြီး စစ်ကောင်စီတပ်တွေကဖမ်းဆီးလိုက်ကြတယ် ” ဟုအမည်မဖော်လိုသည့် သတင်းရင်းမြစ်တစ်ဦးကပြောသည်။
ထို့အပြင် စစ်ကောင်စီတပ်သားများသည် ဆရာတော်ကျောင်းရှိ စစ်ရှောင်များ၏ ပစ္စည်းများအား မွေနှောက်ရှာဖွေကာ လိုချင်သည့် ပစ္စည်းများအား လုယူသွားပြီး ကျောင်းဝေယျာဝစ္စ လုပ်ပေးနေသည့် အမျိုးသားနှစ်ဦးပါ ဆရာတော်နှင့်အတူ ဖမ်းဆီး ခေါ်ဆောင်သွားကြောင်း ၄င်းထံမှဆက်လက် သိရသည်။
“ ဆရာတော်ကျောင်းက စစ်ရှောင်တွေ ပစ္စည်းရှာလို့ လိုချင်တာတွေယူသွားကြတယ် ၊ ကျောင်းမှာလည်းကျောင်းကိစ္စ လုပ်နေတဲ့ အမျိုးသား ၂ ဦးပါ ဖမ်းသွားကြတယ် ” ဟု ဆိုသည်။
အင်းတိမ်ညောင်အုပ်ဆရာတော်သည် စစ်ကောင်စီအာဏာမသိမ်းခင်ကတည်းက ပရဟိတလုပ်ငန်းများ တစ်စိုက်မတ်မတ်လုပ်ဆောင်ကာ အာဏာသိမ်းပြီးနောက်ပိုင်းတွင် စစ်ဘေးရှောင်များကို ကူညီကယ်ဆယ် နေသောဆရာတော်တစ်ပါးဖြစ်ကြောင်း ဒေသခံများထံမှ သိရှိရပါသည်။
#HsanLoiVoice
https://instagram.com/hsan.loivoice?igshid=YmMyMTA2M2Y=
https://hsanloivoice.org/