ပြည်ပနိုင်ငံများသို့ ထွက်ခွာသူ များပြားလာခြင်း၊ အကြောင်းအမျိုးမျိုးဖြင့် သေဆုံးမှုများရှိခြင်းတို့ကြောင့် လူဦးရေကျဆင်းပြီး ပြည်တွင်းလုပ်သားများရှားပါးလာကြောင်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် က ဝန်ခံပြောကြားခဲ့ပါတယ်။
ယမန်နေ့ ဇန်နဝါရီလ(၁၇)ရက် နံနက်ပိုင်းက နေပြည် တော်မှာ ကျင်းပတဲ့ ပြည်ထောင်စုအစည်းအဝေးမှာ စစ်ခေါင်းဆောင်က ယခုလို ပြောကြားတာပဲဖြစ်ပါတယ်။
လွတ်လပ်ပြီး တရားမျှတတဲ့ အထွေထွေရွေးကောက်ပွဲ တစ်ရပ် ကျင်းပနိုင်ရေးအတွက် လူဦးရေနှင့် အိမ်အကြောင်းအရာ သန်းခေါင်စာရင်း ကောက်ယူခြင်းလုပ်ငန်းမှ ကောက်ခံရရှိတဲ့ အချက်အလက်များအရ လူဦးရေကျဆင်းပြီး (၅၁)သန်းကျော်ခန့်သာ ရှိတယ်လို့ သူက ပြောပါတယ်။
စစ်ကောင်စီရဲ့ စစ်မှုထမ်းဥပဒေကြောင့် ပြည်တွင်းရှိ လူငယ်လူလတ်ပိုင်းအရွယ်များ အများအပြား နည်းမျိုးစုံနဲ့ ပြည်ပနိုင်ငံ သို့ ထွက်ခွာခဲ့ကြတာဖြစ်ပါတယ်။
ဒါ့အပြင် စစ်ရေးအရ အရေးနိမ့်လာတဲ့ စစ်ကောင်စီတပ်အနေနဲ့ အင်အားဖြည့်တင်းဖို့ စစ်မှုထမ်း ဆင့်ခေါ်ရာမှာ သွားရောက်ထမ်းဆောင်လိုသူမရှိတာကြောင့် ပေါ်တာဆွဲဖမ်းဆီးမှုများ မြို့နယ်တိုင်းလိုလို လုပ်ဆောင်လာတဲ့အတွက် ပြည်သူများအနေနဲ့ နီးစပ်ရာ ထိုင်းနိုင်ငံသို့ ထွက်ခွာမှု ပိုမိုများပြားလာခြင်း ဖြစ်တယ်လို့ သိရပါတယ်။
