အကြမ်းဖက်တိုက်ဖျက်ရေးဥပဒေပုဒ်မ ၅၀(ည)၊ ပုဒ်မ ၅၂(က)ဖြင့် တရားစွဲဆိုခံရသူနဲ့ ယင်းပြစ်မှုဖြင့် ထွက်ပြေးတိမ်းရှောင်နေသူ အပါအဝင် တရားစွဲဆိုခံထားရသူ ၁၂၄၈၇ ဦး ရဲ့ တရားရုံးကြားနာ စစ်ဆေးဆဲ အမှုပေါင်း ၉၅၃၂ မှုကို ပိတ်သိမ်းလိုက်တယ်လို့ အမျိုးသားကာကွယ်ရေးနှင့် လုံခြုံရေး ကောင်စီ က ဒီကနေ့မှာ အမိန့်ထုတ်ပြန်လိုက်ပါတယ်။
ဒီကနေ့ မတ်လ ၂ ရက်မှာ ကျရောက်တဲ့ တောင်သူလယ်သမားနေ့ အထိမ်းအမှတ်အဖြစ် အကြမ်းဖက်မှု တိုက်ဖျက်ရေးဥပဒေနဲ့ တရားစွဲဆိုခံရသူကို အမှုပိတ်သိမ်းတာလို့ ထုတ်ပြန်ထားပါတယ်။
ဒါ့အပြင် အကြမ်းဖက်ဥပဒေနဲ့ ပြစ်မှုကျူးလွန်ပြီး အကျဥ်းထောင်၊ အချုပ်ထောင်၊ စခန်းအသီးသီးမှာ ချုပ်နှောင်ခံထားရတဲ့ အကျဥ်းသား/သူ ၇၃၃၇ ဦး တို့ကိုလည်း ပြစ်ဒဏ်လွတ်ငြိမ်းခွင့်ပြုလိုက်ပြီး နောက်တစ်ကြိမ် ပြစ်မှုထပ်မံကျုးလွန်ရင် အဲ့ဒီပြစ်ဒဏ်အပြင် အခုကျခံဖို့ ကျန်ရှိတဲ့ ပြစ်ဒဏ်တွေကိုပါ ဆက်လက်ကျခံပါမယ် ဆိုတဲ့ သတ်မှတ်ချက်နဲ့ ပြန်လွတ်ပေးတာဖြစ်ပါတယ်။
အဲ့ဒီအပြင် နောက်ထပ် အကျဥ်းသား/သူ ၂၈၂၅ ဦး နဲ့ နိုင်ငံခြားသား အကျဥ်းသား/သူ ၁၀ ဦးကိုလည်း ပြစ်ဒဏ်လွတ်ငြိမ်းခွင့်ပြုလိုက်ပြီး ပြည်နှင်ဒဏ်ပေးလိုက်တယ်လို့ ကာ/လုံ က အမိန့်ထုတ်ပြန် ထားပါတယ်။
ဆက်လက်ပြီး ၂၀၂၆ ခုနှစ် မတ်လ ၂ ရက်နေ့ မတိုင်မီ လူသတ်မှု၊ မုဒိမ်းမှု၊ ပေါက်ကွဲစေတတ်တဲ့ ဝတ္ထုပစ္စည်းများ အက်ဥပဒေ၊ မတရားအသင်းများ အက်ဥပဒေ၊ လက်နက်ဥပဒေ၊ ရှမ်းပြည်နယ် လက်နက်အမိန့်အရ ပြစ်မှုများ၊ သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေ၊ အကြမ်းဖက်မှု တိုက်ဖျက်ရေးဥပဒေနဲ့ အဂတိလိုက်စားမှုတိုက်ဖျက်ရေး ဥပဒေနဲ့ ပြစ်ဒဏ်ကျခံနေသူမှ အပ တည်ဆဲ ဥပဒေအရ ပြစ်ဒဏ်ကျခံနေသူတွေရဲ့ ကျန်ရှိတဲ့ ပြစ်ဒဏ် ခြောက်ပုံတစ်ပုံကို လွတ်ငြိမ်းသက်သာခွင့် ပြုလိုက်တယ်လို့ အမိန့်ထုတ်ပြန်ခဲ့ပါတယ်။