သျှမ်းပြည်နယ်မြောက်ပိုင်း TNLA ထိန်းချုပ်နယ်မြေဖြစ်တဲ့ မန်တုံမြို့နဲ့ မိုင်းငေါ့မြို့မှာ လေကြောင်း တိုက်ခိုက်ခံရတာကြောင့် အရပ်သားပြည်သူ ၁ ဦးသေဆုံးပြီး ၆ ဦးထိခိုက်ဒဏ်ရာရကာ နေအိမ် ၁၀ လုံးကျော် ထိခိုက်ပျက်စီးခဲ့တယ်လို့ သိရပါတယ်။
ယမန်နေ့ မေလ ၁၂ ရက် ည ၁၀ နာရီခွဲခန့်အချိန်တွင် သျှမ်းမြောက် မန်တုံမြို့ အောင်ချမ်းသာရပ်ကွက်မှာ စစ်ကောင်စီက လေကြောင်းကနေ ၂ ကြိမ် ဗုံးလာရောက်ကြဲချတိုက်ခိုက်တာကြောင့် အမျိုးသား တစ်ဦး သေဆုံးပြီး ၆ ဦးထိခိုက်ဒဏ်ရရှိကာ နေအိမ် ၁၀ လုံးကျော်ထိခိုက်ပျက်စီးသွားတယ်လို့ ဒေသတွင်းသတင်းရင်းမြစ်က သိရပါတယ်။
ဒါ့အပြင် ယမန်နေ့ ည ၇း၄၀ မိနစ်အချိန်တွင်လည်း မိုင်းငေါ့မြို့၊ တာလုံရပ်ကွက်အတွင်းရှိ စာသင် ကျောင်းအနီးမှာ စစ်ကောင်စီတပ်မှ ဂျက်ဖိုက်တာဖြင့် ဗုံး(၄)လုံး လာရောက်ကြဲချ တိုက်ခိုက်ခဲ့တယ်လို့ သိရပါတယ်။
ယမန်နေ့ မေလ ၁၂ ရက် တစ်ရက်ထဲမှာဘဲ စစ်ကောင်စီက တော်လှန်ရေးအဖွဲ့ အုပ်ချုပ်တဲ့ နယ်မြေဖြစ်တဲ့ စစ်ကိုင်းတိုင်းအတွင်းရှိ ဒီပဲယင်း၊ မော်လူး၊ ချောင်းဦးနဲ့ သျှမ်းပြည်နယ်မြောက်ပိုင်း မန်တုံ၊ မိုင်းငေါ့ တို့ကို လေကြောင်းဗုံးကြဲတိုက်ခိုက်မှုကြောင့် ကလေးငယ်အပါအဝင် အရပ်သားပြည်သူ စုစုပေါင်း ၂၀ ကျော် သေဆုံးခဲ့တယ်လို့ သိရပါတယ်။
