သျှမ်းပြည်မြောက်ပိုင်း၊ TNLA ထိန်းချုပ်နယ်မြေရှိ မိုင်းငေါ့မြို့မှာ ယနေ့အောက်တိုဘာလ ၈ ရက် နံနက် ၁၁ နာရီ ဝန်းကျင်အချိန်တွင် စစ်တပ်က လေကြောင်းနဲ့ ဗုံးကြဲတိုက်ခိုက်ခဲ့တယ်လို့ သိရပါတယ်။
စစ်ကောင်စီရဲ့ ဗုံးကြဲမှုကြောင့် မိုင်းငေါ့မြို့ရှိ တာလုံရပ်ကွက်အတွင်းသို့ ကျရောက်ပေါက်ကွဲပြီး လူထိခိုက်သေဆုံးမှုရှိပြီး နေအိမ်များလည်း ထိခိုက်ပျက်စီးတယ်လို့ စုံစမ်းသိရပါတယ်။
“ဒီနေ့ ၁၁ နာရီ ၅ မိနစ်မှာ ဂျက်ဖိုက်တာနဲ့ လာကြဲသွားတာ၊ မန်လုံဘက်က လင်မယား ၂ ယောက် သေတယ်၊ တာလုံရပ်ကွက်ထဲက တစ်ယောက်ထိထားတယ်” လို့ ဒေသခံသတင်းရင်းမြစ်ထံမှ သိရပါတယ်။
ယမန်နေ့ နေ့လည်ကလည်း TNLA ထိန်းချုပ်နယ်မြေ မိုင်းလုံမြို့ မန်ဟုန်းကျေးရွာကို စစ်တပ်က လေကြောင်းဗုံးကြဲတိုက်ခိုက်တာကြောင့် ကလေး ၁ ဦး အပါအ၀င် ပြည်သူ ၁၀ ဦး သေဆုံးခဲ့ပြီး ၃ ဦး ထိမှန်ဒဏ်ရာရရှိခဲ့ပါတယ်။
စစ်တပ်က ကျောက်မဲမြို့ကို အလုံးစုံ ပြန်လည်ထိန်းချုပ်နိုင်ပြီးတဲ့နောက် TNLA ထိန်းချုပ်တဲ့ နယ်မြေတွေဖြစ်တဲ့ မန်တုံ၊ နမ္မတူ၊ သီပေါ၊ မိုင်းငေါ့၊ နမ့်ဆန် စတဲ့မြို့တွေကို လေကြောင်းတိုက်ခိုက်မှု ဆက်တိုက်လုပ်ဆောင်လာတာဖြစ်ပြီး ဗုံးကြဲမှုကြောင့် ယခု အောက်တိုဘာအတွင်း သေဆုံးသူ ၂၀ ထက်မနည်းရှိတယ်လို့ TNLA ရဲ့ အချက်အလက်အရ သိရပါတယ်။