သျှမ်းပြည်နယ် ဖွဲ့စည်းပုံအခြေခံဥပဒေရေးဆွဲရေးအတွက် အခြေခံမူ ၃၃ ချက်နဲ့ အခြေခံအခွင့်အရေး များ ၃၈ ချက် ကို သျှမ်းပြည်အမျိုးသားညီလာခံ (ပထမအကြိမ်)မှာ ဆွေးနွေးအတည်ပြုနိုင်ခဲ့တယ်လို့ ဒီကနေ့ ဖေဖော်ဝါရီလ ၆ ရက်မှာ ထုတ်ပြန်ထားပါတယ်။
သျှမ်းပြည်ပြန်လည်ထူထောင်ရေးကောင်စီ (RCSS) က ကမကထပြုပြီး သျှမ်းပြည်အမျိုးသားညီလာခံ (ပထမအကြိမ်)ကို ဖေဖော်ဝါရီလ ၂ ရက်နေ့မှ ၄ ရက်နေ့အထိ RCSS ဗဟိုဌာနချုပ်မှာ ကျင်းပခဲ့တယ်လို့ သိရပါတယ်။
အတည်ပြုနိုင်ခဲ့တဲ့ အခြေခံမူ ၃၃ ချက်နဲ့ အခြေခံအခွင့်အရေးများ ၃၈ ချက်ကို အကောင်အထည်ဖော်ရန် နဲ့ ရှေ့လုပ်ငန်းစဥ်များ ဆောင်ရွက်ရန် သျှမ်းပြည်နယ်ဖက်ဒရယ်ရေးရာ ဦးဆောင်အဖွဲ့ကို ကနဦးဖွဲ့စည်း နိုင်ခဲ့တယ်လို့ဖော်ပြထားပါတယ်။
သျှမ်းပြည်နယ်အတွင်းရှိ လူမျိုးစုများ ငြိမ်းချမ်းစွာ အတူယှဥ်တွဲနေထိုင်ရေး၊ ရေရှည်တည်တံ့သော ငြိမ်းချမ်းရေးတည်ဆောက်ရေး၊ ကိုယ်ပိုင်ပြဋ္ဌာန်းခွင့်နှင့် တန်းတူအခွင့်အရေးတို့ကို ဖော်ဆောင်နိုင်ရေး၊ သျှမ်းပြည်နယ်ဖွဲ့စည်းပုံအခြေခံဥပဒေပေါ်ထွန်းရေး၊ သျှမ်းပြည်နယ်ကို ကိုယ်စားပြုသော နိုင်ငံရေးစုဖွဲ့မှု တစ်ရပ် ပေါ်ထွန်းလာရေးတို့အတွက် သျှမ်းပြည်အမျိုးသားညီလာခံမှာ ပူးပေါင်းပါဝင်ကြပါရန် သျှမ်းပြည်အတွင်းရှိ အဖွဲ့အစည်းများ၊ လူမျိုးစုများအားလုံးကိုလည်း ကမ်းလှမ်းဖိတ်ခေါ်ထားကြောင်း ထုတ်ပြန်ကြေညာထားပါတယ်။
သျှမ်းပြည်အမျိုးသားညီလာခံမှာ သံဃာတော်များ၊ သျှမ်းပြည်အတွင်းရှိ လက်နက်ကိုင်တော်လှန်ရေး အဖွဲ့အစည်းများ၊ နိုင်ငံရေးပါတီများ၊ နိုင်ငံရေးအစုအဖွဲ့များ၊ အရပ်ဖက်အဖွဲ့များ၊ လူငယ်အဖွဲ့များ၊ မြို့နယ် အသီးသီးမှ ကိုယ်စားလှယ်များ စုစုပေါင်း ၁၀၅ ဦး တက်ရောက်ခဲ့တယ်လို့ သိရပါတယ်။