မတ်လ ၄ ရက်နေ့ သာစည်မြို့နယ်၊ ကျွဲတပ်ဆုံဂိတ်တွင် သျှမ်းပြည် မြောက်ပိုင်းမှ ရန်ကုန်တိုင်းသို့ ဆီဘောက်ဆာယာဉ်ဖြင့် အိုက်စ် (မက်သ်အဖက်တမင်း) များ သယ်ဆောင်သွားမည့် ဆီဘောက်ဆာ ၈ ဘီးယာဉ်ကို စစ်ဆေးရာ ယာဉ်၏ကိုယ်ထည်အတွင်း သိုဝှက်သယ်ဆောင်လာသည့် ဒေသကာလတန်ဖိုးငွေကျပ် ၃၀ ဘီလီယံ တန်ဖိုးရှိ အိုက်စ် (မက်သ်အဖက်တမင်း) ၁ ဒသမ ၅ တန် သိမ်းဆည်းရမိခဲ့ကြောင်း မူးယစ်အဖွဲ့က ယနေ့ ရေးသားဖော်ပြလိုက်သည်။
သယ်ဆောင်ရာတွင် ပူးပေါင်းပါဝင်သူ ကိုဘုန်း (ခ) ဘုန်းနိုင်ဝင်းအား မတ်လ ၅ ရက်နေ့ မွန်းတည့် ၁၂ နာရီအချိန်တွင် တောင်ကြီးမြို့၊ ကျောင်းကြီးစုရပ်ကွက်၊ နယ်မြေ(၁၂)၊ နေအိမ်တွင် FORD ယာဉ် ၁ စီး နှင့်အတူ ဆက်လက်ဖမ်းဆီးရမိခဲ့ကြောင်း၊ ယခင်ဖမ်းဆီးရမိခဲ့သည့် အိုက်စ်(မက်သ်အဖက်တမင်း)များမှာ လက်ဖက်ခြောက်အိတ်ခွံအမျိုးမျိုးဖြင့် ထုပ်ပိုးခြင်းဖြစ်ပြီး ယခုဖမ်းဆီးရမိခဲ့သည့် အိုက်စ်(မက်သ်အဖက်တမင်း)များမှာ လက်ဖက်ခြောက်အိတ်ထုပ်ပိုးခွံ အမှတ်တံဆိပ်အသစ်ဖြင့် ထုပ်ပိုးထားသည်ဟုဆိုသည်။
အိုက်စ် (မက်သ်အဖက်တမင်း) များကို ရှမ်းပြည်နယ်မှ ရန်ကုန်တိုင်းဒေသကြီးသို့ သယ်ဆောင်ပြီး ၎င်းမှတစ်ဆင့် ပင်လယ်ရေကြောင်းအသုံးပြု၍ ပြည်ပသို့ ဆက်လက်သယ်ဆောင်မည်ဖြစ်သည်ဟု သိရသည်။
Ref: CCDAC