တော်လှန်ရေးအင်အားစုများ သိမ်းပိုက်ထားသော သျှမ်းပြည်နယ်မြောက်ပိုင်းရှိ မြို့များအား စစ်ကောင်စီက တိုက်လေယာဉ်များဖြင့် နေ့စဉ် ဗုံးကြဲတိုက်ခိုက်နေသည်။ ယမန်နေ့ နိုဝင်ဘာလ (၄)ရက်နေ့ မွန်းလွဲ (၂) နာရီဝန်းကျင်ခန့်တွင် သျှမ်းပြည်နယ်မြောက်ပိုင်း နောင်ချိုမြို့အား စစ်ကောင်စီက တိုက်လေယာဉ်ဖြင့် ဗုံးကြဲတိုက်ခိုက်မှုပြုလုပ်ခဲ့ပြီး လူနေအိမ်များ ထိခိုက်ပျက်စီးခဲ့သည်။ သို့သော် နောင်ချိုမြို့တွင်း ဒေသခံများစွာ ထွက်ပြေးတိမ်းရှောင်ထားသောကြောင့် လူထိခိုက်သေဆုံးမှုမရှိကြောင်း သိရသည်။
ဒါ့အပြင် နိုဝင်ဘာလ (၁) ရက်နေ့နှင့် (၃) ရက်နေ့တွင်လည်း နောင်ချိုမြို့နယ် ဆမ္မဆယ်ရွာအား စစ်ကောင်စီက ဗုံးကြဲတိုက်ခိုက်မှုပြုလုပ်ခဲ့ပြီး ကြံကုမ္ဗဏီမှ ဝန်ထမ်းများအပါအဝင် (၄)ဦး ထိခိုက်သေဆုံးခဲ့ရပြီး (၈)ဦးခန့် ဒဏ်ရာပြင်းထန်စွာ ရရှိခဲ့သည်။
ယနေ့ နိုဝင်ဘာလ (၅)ရက်နေ့ နံနက်(၁)နာရီဝန်းကျင်ခန့်တွင်လည်း သျှမ်းပြည်နယ်မြောက်ပိုင်း လားရှိုးမြို့နယ် မယ်ဟန်ရွာအား စစ်ကောင်စီက လေယာဉ်ဖြင့် ဗုံးကြဲတိုက်ခိုက်မှု ပြုလုပ်ခဲ့ပြီး လူနေအိမ်များ ထိခိုက်ပျက်စီးခဲ့သည်။ လက်ရှိ စုံစမ်းသိရှိမှုအရ လူထိခိုက်သေဆုံးမှုမရှိပါ။
