သျှမ်းပြည်နယ်မြောက်ပိုင်း ကျောက်မဲမြို့နယ်အတွင်း RCSS အဖွဲ့နှင့် SSPP အဖွဲ့ပါဝင်သည့် မြောက်ပိုင်းမဟာမိတ်တို့ တိုက်ပွဲဖြစ်ပွားပြီးနောက် ကျေးရွာ ၂၆ ရွာထက်မနည်း ထွက်ပြေးတိမ်းရှောင်ခဲ့ရသည်။
အဆိုပါရွာများထဲ၌ ကျောက်မဲမြို့နယ် ဟူးဆွန်ရွာ၊ တော့ဆန်ရွာ၊ ပုံးလုံရွာနှင့် အနီးအနားရွာတို့တွင် နေထိုင်သူလုံးဝမရှိတော့ဘဲ ကျေးရွာပျက်များသဖွယ်ဖြစ်နေပြီး လူသူကင်းမဲ့လျက်ရှိသည်။ ဒါ့အပြင် ကျေးရွာအတွင်းရှိ နေအိမ်များလည်း ချုံနွယ်များတွယ်တက်လျက်ရှိကာ ပျက်စီးနေပါသည်။
(၂၄.၄.၂၀၂၃) ရက်နေ့တွင်လည်း ဟူးဆွန်ရွာသားများ SSPP အဖွဲ့ထံ မိမိတို့ကျေးရွာတွင်းကို ဝင်ရောက်ကြည့်ရှုခွင့်တောင်းခံခဲ့ပြီး SSPP အဖွဲ့မှ TNLA အဖွဲ့၏ ခွင့်ပြုချက်ရယူခဲ့ရကြောင်း ဒေသခံများကပြောပြသည်။ ဒါ့အပြင် ရွာသူရွာသားများမှ မိမိတို့နေအိမ်၌တစ်ညတည်းခိုခွင့်ပြုရန် ခွင့်တောင်းခဲ့သော်လည်း TNLA အဖွဲ့မှ ခွင့်မပြုသောကြောင့် နေ့တစ်ပိုင်းသာ ရွာအတွင်းကြည့်ရှုခွင့်ရခဲ့သည်။
ကျေးရွာအတွင်း ပျက်စီးနေသော မိမိတို့အိမ်များနှင့် ဘုန်းကြီးကျောင်းများကိုမြင်တွေ့ခဲ့ရသည့်အတွက် ရွာသားများ မျက်ရည်ကျခဲ့ရသည်ဟု ဆိုသည်။
