သျှမ်းပြည်နယ်မြောက်ပိုင်း သီပေါမြို့နယ်တွင် ယခုတစ်ပတ်တွင်း CDM ပညာရေးဝန်ထမ်း ဆရာ/မ များကို စစ်ကောင်စီမှ ရှောင်တခင် ဝင်ရောက်ဖမ်းဆီးခြင်းကို ခံနေရကြောင်း သိရသည်။ စစ်ကောင်စီခန့် အုပ်ချုပ်ရေးပိုင်းနှင့် လဝက တို့မှ အိမ်ထောင်စုစာရင်းများကို လိုက်လံကောက်ခံနေပြီး ထိုမှတဆင့် CDM စာရင်းကို ရယူပြီး လိုက်လံဖမ်းဆီးနေခြင်းဖြစ်သည်ဟုလည်း ဆိုသည်။
“သီပေါမြို့နယ်နဲ့နမ့်လန်မြို့နယ်မှာ CDM ဝန်ထမ်းတွေကို လာဆွဲသွားတာ ကျနော်တို့သိသလောက် ဒီတစ်ပတ်ထဲမှာ (၈) ယောက်လောက်ပါသွားပြီထင်တယ်ဗျ။ လာဖမ်းတာက လားရှိုးက စစ်သားတွေဖြစ်တယ်လို့ပြောတယ်။ အခုဆို CDM လုပ်ထားတဲ့ ဆရာ/မ တွေနဲ့ မိဘတွေက ထိတ်လန့်နေကြပြီ။ ဒီတစ်ပတ်ထဲမှာက အိမ်ထောင်စုစာရင်းတွေလည်း လိုက်ကောက်နေကြတော့ အဲ့ကနေတဆင့် သတင်းရပြီး ဖမ်းတာလား မသိပါဘူး။” သီပေါ ဒေသခံတစ်ဦးက ပြောပြသည်။
CDM ဝန်ထမ်းတွေကို ဦးတည်ပြီး လိုက်လံဖမ်းဆီးနေခြင်းအပြင် ထပ်မံဖမ်းဆီးရန်ရှိနေကြောင်း သျှမ်းပြည်နယ်မြောက်ပိုင်း မြို့နယ်တော်တော်များများတွင် သတင်းပျံ့နှံ့လျက်ရှိကြောင်း သတင်းရရှိသည်။