သျှမ်းပြည်နယ်တောင်ပိုင်း ဆီဆိုင်နှင့်ဟိုပုံးမြို့နယ်အတွင်း စစ်ကောင်စီက အဆိပ်ငွေ့နှင့် မီးလောင်ဗုံးများအသုံးပြုတိုက်ခိုက်နေဟုဆို

သျှမ်းပြည်နယ်တောင်ပိုင်း ဆီဆိုင်မြို့နယ် နှင့် ဟိုပုံးမြို့နယ်တွင် တိုက်ပွဲများဆက်လက်ပြင်းထန်နေပြီး မဲနယ်တောင်ဒေသ ပင်လျမ်းရွာကို စစ်ကောင်စီက ဒုတိယအကြိမ်း လက်နက်ကြီးများ မီးလောင်ဗုံးများဖြင့် ဗုံးကြဲတိုက်ခိုက်ခဲ့ကြောင်း PNLA က ထုတ်ပြန်ခဲ့သည်။

ယမန်နေ့ (၁၀.၃.၂၀၂၄)တွင်လည်း စစ်ကောင်စီက စစ်ကြောင်းထိုးလာသဖြင့် ဆီဆိုင်မြို့နယ်နှင့် ဟိုပုံးမြို့နယ်တို့တွင် စစ်ကောင်စီတပ်နှင့် PNLA+KNDF+PDF တို့ တိုက်ပွဲများ ပြင်းထန်စွာဖြစ်ပွားခဲ့သည်ဟု ဆိုသည်။

စစ်ကောင်စီသည် ဆီဆိုင်မြို့တွင်းသို့ လက်နက်ကြီးများ ဒရုန်းများ အသုံးပြုပြီး တိုက်ခိုက်မှု ၁၀၈ ကြိမ် ပြုလုပ်ခဲ့သလို လေကြောင်းဗုံးကြဲတိုက်ခိုက်မှုပါ ပြုလုပ်ခဲ့သည်။

တိုက်ခိုက်ခြင်းကြောင့် မြို့တွင်းရှိ ပြည်သူလူထုများ၏ နေအိမ် ၁၆ အိမ်ထက်မနည်း ထိခိုက်ပျက်စီးခဲ့ရသည်။

ယမန်နေ့တွင်ပင် ဟိုပုံးမြို့နယ် မဲနယ်တောင်ဒေသ စအွန်တောင်ကြောတွင်လည်း စစ်ကောင်စီက စစ်ကြောင်းထိုးလာသဖြင့် တိုက်ပွဲပြင်းထန်စွာဖြစ်ပွားခဲ့သည်။

စစ်ကောင်စီက မီးလောင်းဗုံးဖြင့် ဗုံးကြဲတိုက်ခိုက်ခြင်း လက်နက်ကြီးအချက် ၂၀ ကျော်ပစ်ခတ်တိုက်ခိုက်ခြင်းကြောင့် ပင်လျမ်းကျေးရွာကို မီးလောင်ကျွမ်းခဲ့ပြီး နေအိမ်အများအပြားမီးလောင်ပျက်စီးခဲ့သည်ဟု သိရသည်။